प्रशिक्षकाकडून विनयभंग

प्रशिक्षकाकडून विनयभंग

नवी मुंबई : बुद्धिबळ शिकण्यासाठी येणाऱ्या दहा वर्षीय मुलीसोबत अश्लिल चाळे केल्याप्रकरणी विनयभंगाचा गुन्हा दाखल करण्यात आलेल्या सौरभ बर्वे (३३) या प्रशिक्षकाला नेरुळ पोलिसांनी सोमवारी रात्री डोंबिवली येथील त्याच्या घरातून अटक केली. न्यायालयाने त्याला एक दिवसाची पोलिस कोठडी ठोठावली.

सौरभ बर्वे हा सुप्रसिद्ध बुद्धिबळपटू असून तो नेरुळ सेक्टर २१मधील यूसीएमएएस या खासगी इन्स्टिट्युटमध्ये बुद्धिबळचे प्रशिक्षण देण्याचे काम करत होता. या इन्स्टिट्युटसह तो विविध ठिकाणच्या खासगी इन्स्टिट्युटमधूनही विद्यार्थ्यांना प्रशिक्षण देत आहे. दरम्यान, नेरुळ भागातील दहा वर्षीय मुलगी नेरुळ सेक्टर २१मधील यूसीएमएएस या खासगी इन्स्टिट्युटमध्ये बुद्धिबळचे प्रशिक्षण घेण्यासाठी जात होती. २८ जुलै रोजी पीडित मुलगी आपल्या लहान भावासह सायंकाळी प्रशिक्षण घेत असताना बर्वे याने तिच्याशी अश्लील चाळे केले. या मुलीने याबाबत पालकांना माहिती दिल्यानंतर त्यांनी नेरुळ पोलिसांत तक्रार केली.