म. टा. विशेष प्रतिनिधी, मुंबई
पुन्हा एकदा २६ जुलैची रात्र मुंबई आणि मुंबई परिसरातील नागरिकांमध्ये पावसाची दहशत निर्माण ठरणारी रात्र ठरली. मुंबईने शुक्रवार २६ जुलै सकाळी ८.३० ते शनिवार २७ जुलै या काळात पडलेला पाऊस हा दहा वर्षांमधील जुलैमधील सर्वाधिक पाऊस होता. सांताक्रूझ येथे २४ तासांमध्ये २१९ मिलीमीटर पाऊस नोंदला गेला तर कुलाबा येथे ९० मिलीमीटर पावसाची नोंद झाली. शुक्रवारी रात्रीपासूनच पावसाचा जोर वाढला होता. ढगांचा गडगडाट आणि वीजांचा लखलखाटही सुरू होता.
मुंबईकरांची शनिवारची सकाळी ढगांचा गडगडाट ऐकून झाली. सातत्याने अर्धा-एक तास पाऊस पडल्यानंतर मुंबईमध्ये पाऊस विश्रांती घेत होता. त्यामुळे मुंबईमध्ये फारसे पाणी साचले नाही. मात्र २४ तासांमध्ये मुंबईने रेकॉर्डब्रेक पाऊस अनुभवला. या आधी सन २००९ मध्ये जुलै महिन्यात २७४.१ मिलीमीटर पाऊस अनुभवला होता. अर्थात सन २००५चा अपवादात्मक पाऊस हा शतकातील जुलैमधील सर्वाधिक पाऊस आहे.
शनिवारी संध्याकाळी ७.३० नंतर शहरामध्ये पुन्हा एकदा पावसाचा जोर वाढला. शुक्रवारी संध्याकाळी ८ पासून शनिवारी संध्याकाळी ८ पर्यंत अंधेरी येथे ११९.४ मिलीमीटर, वांद्रे येथे १८८ मिलीमीटर, चेंबूर येथे ९७ मिलीमीटर पाऊस नोंदवण्यात आला. ठाणे, अंबरनाथ, कल्याण येथे सुरू असलेल्या पावसाच्या धुमाकूळाच्या तुलनेत मुंबई मात्र शांत होती. सकाळी ८.३० पासून रात्री ८.३० पर्यंतच्या १२ तासांमध्ये सांताक्रूझ येथे तर कुलाबा येथे मिलीमीटर पाऊस नोंदवला गेला. या काळामध्ये महापालिकेकडे नोंदवलेल्या तक्रारींनुसार शहरामध्ये ११, पूर्व उपनगरात ११ तर पश्चिम उपनगरात तब्बल ३५ ठिकाणी फांद्या किंवा झाडे पडली. शनिवारच्या दिवसात या ५७ तक्रारी महापालिकेकडे प्राप्त झाल्या आहेत. तर सात ठिकाणी शॉर्टसर्किटच्या घटना घडल्या.
सध्या पावसासाठी निर्माण झालेली अनुकूल स्थिती पाहता पुढील तीन दिवस मुंबईमध्ये संततधारेची शक्यता आहे. पावसाचा जोर रविवारीही थोडा जास्त असण्याचा अंदाज प्रादेशिक हवामान विभागातर्फे वर्तवण्यात आला आहे. मुंबई, ठाणे, पालघर आणि रायगडमध्ये एखाद-दुसऱ्या ठिकाणी अती तीव्र मुसळधार पावसाची शक्यता आहे. या चारही जिल्ह्यांना यासंदर्भात रेड अलर्ट देण्यात आला असून रविवारी दुपारी यासंदर्भातील सुधारित इशारा देण्यात येईल. या चारही जिल्ह्यांमध्ये सोमवारी मुसळधार ते तीव्र मुसळधार पावसाची शक्यता आहे. शनिवारी आणि रविवारी रत्नागिरी आणि सिंधुदुर्गमध्येही मुसळधार ते तीव्र मुसळधार पाऊस काही ठिकाणी अनुभवायला मिळण्याचा अंदाज आहे. मुंबईमध्ये ३० जुलैला पावसाचा जोर थोडा कमी होईल अशी शक्यता मॉडेलवरून दिसत आहे. या पार्श्वभूमीवर पुढील दोन दिवस समुद्रामध्ये मासेमारीसाठी न जाण्याचा इशारा मच्छिमारांना देण्यात आला आहे. कोकणासह मध्य महाराष्ट्र आणि मराठवाड्यामध्येही रविवारी मुसळधार पावसाची शक्यता वर्तवण्यात आली आहे. शनिवारीही तहानलेल्या मराठवाड्याला दिलासा मिळाला.