नवी मुंबई : केंद्रीय गृहनिर्माण व नगरविकास मंत्रालयाने देशातील विविध शहरांतील शहर वाहतूक प्रकल्पांतर्गत सहा प्रकारांत नाविन्यपूर्ण बाबी राबविणाऱ्या परिवहन संस्थांचे मानांकन मागविले होते. त्यामध्ये नवी मुंबई महानगरपालिकेच्या परिवहन उपक्रमाला (एनएमएमटी) नागरी परिवहन सुधारणेत पुढाकार घेणारी सर्वोत्तम परिवहन संस्था म्हणून गौरविण्यात आले. या पुरस्काराचे वितरण नुकतेच लखनऊ येथे झाले.
भारत सरकारच्या गृहनिर्माण व नगरविकास मंत्रालयाने देशातील विविध शहरांतील शहर वाहतूक प्रकल्पाबाबत सहा वर्गवारीमध्ये नावीन्यपूर्ण प्रकल्प राबविणाऱ्या परिवहन संस्थांचे नामांकन मागविले होते. यामध्ये सहा वर्गांचा समावेश होता. त्यापैकी एनएमएमटी उपक्रमाने 'बेस्ट सिटी इन अर्बन ट्रान्सपोर्ट इनिशिएटिव्ह' या प्रकारात आपले नामांकन सादर केले. यामधील पर्यावरणयुक्त इलेक्ट्रिक बस, प्रवाशांच्या मार्गदर्शन व हितार्थ कार्यान्वित करण्यात आलेली एकात्मिक परिवहन व्यवस्थापन प्रणाली, पीआयएस प्रणाली, मोबाइल अॅप, तेजस्विनी बस तसेच महापालिकेमार्फत सुरू करण्यात आलेली सार्वजनिक सायकल सामायिकरण (पीबीएस-यूलू बायसिकल) या मुद्द्यांचा समावेश करण्यात आला होता. हा पुरस्कार एमएमएमटीचे परिवहन व्यवस्थापक शिरीष आरदवाड आणि मुख्य लेखा व वित्त अधिकारी दिनेश नलावडे यांनी स्वीकारला.