विमानतळाच्या उभारणीला वेग

म. टा. वृत्तसेवा, नवी मुंबई आंतरराष्ट्रीय विमानतळ उभारणीच्या कामांना चालना देत नियोजित वेळेत नवी मुंबई येथील विमानतळ कार्यान्वित करण्यासाठी सिडको प्रशासनाने कंबर कसली आहे. त्यासाठी पात्र तीन निविदाधारकांसोबत नुकतीच एक बैठक घेऊन त्यांनी सुचविलेल्या विविध सातशे प्रश्नांवर लवकरात लवकर मार्ग काढण्याची तयारी सिडकोने केली आहे. नवी मुंबईतील आंतरराष्ट्रीय विमानतळाच्या पहिल्या टप्प्याला मंजुरी मिळाल्यानंतर सिडकोने विमानतळ उभारणीच्या कामाला गती दिली आहे. पहिल्या टप्प्याच्या कामाला सुरुवात करण्यासह विमानतळाच्या दुसऱ्या टप्प्यातील कामांना मंजुरी मिळविण्यासाठी सिडको प्रशासनाने प्रयत्न सुरू केले आहेत. सिडकोच्या सहव्यवस्थापकीय संचालिका व्ही. राधा यांनी दोन दिवसांपूर्वी दिल्लीत व केंद्रीय पर्यावरण मंत्रालयाच्या उच्च अधिकाऱ्यांसोबत बैठक घेऊन विमानतळ उभारणीच्या कामासंदर्भातील माहिती दिली आहे. सिडकोने विमानतळ उभारणीसाठी आंतरराष्ट्रीय पातळीवर निविदा प्रक्रिया राबविली होती. या निविदा प्राक्रियेत यशस्वी झालेले जीएमआर एअरपोर्ट, मुंबई इंटरनॅशनल एअरपोर्ट प्रा. लि.(एमआयएएल), एमआयए इन्फ्रास्ट्रक्चर प्रा. लि. (व्हीन्सी एअरपोर्ट एस.ए. अॅण्ड टाटा रिअॅलिटी) या तीन निविदाकारांना सिडकोने रिक्वेस्ट फॉर प्रपोजल सादर करण्यास सांगितले आहे. त्यासंदर्भात सिडकोचे व्यवस्थापकीय संचालक भूषण गगराणी यांनी नुकतीच पात्र निविदाधारकांसोबत प्री बीड मीटिंग घेतली. यावेळी या तिन्ही निविदाधारकांनी प्रत्यक्ष विमानतळ उभारणीच्या कामाला सुरुवात करताना त्यांना येणाऱ्या ७०० विविध अडचणी, समस्या व प्रश्नांचे स्पष्टीकरण सिडको व्यवस्थापनाकडे मागितले आहे. अडचणी दूर होणार

यासंदर्भात येत्या १२ जुलै रोजी दिल्लीत होणाऱ्या बैठकीत फॉरेस्टची अंतिम मंजुरी प्राप्त झाल्यानंतर विमानतळ उभारणीतील सर्व परवानग्या व अडचणी दूर होणार आहेत. तसेच, सिडकोने प्रत्यक्ष विमानतळ उभारणीच्या कामाआधी प्री डेव्हलपमेंट वर्क्सच्या कामांना सुरुवात केली आहे. यात उलवा टेकडीची उंची कमी करण्याचे सुमारे १६०० कोटी खर्चाच्या कामासह गाढी नदीचे पात्र बदलणे, जमीन सपाटीकरण, उच्च दाबाच्या विद्युत वाहिन्या भूमिगत करणे आदी कामांचा यात समावेश आहे.