डॉ. माने यांची पदविका वादात

पालिकेत कार्यरत राहून डीपीएच अभ्यासक्रमाचे शिक्षण

म. टा. वृत्तसेवा, नवी मुंबई

रुग्णालय नोंदणी भ्रष्टाचार, बेकायदा रुग्णालयांना अभय आदी गंभीर आरोप झालेले महापालिका आरोग्य विभागातील वादग्रस्त डॉ. वसंत माने यांचा नवा कारनामा उघडकीस आला आहे. डॉ. माने यांनी पालिकेत कार्यरत राहून डीपीएच अभ्यासक्रमाची पदविका प्राप्त करताना दोन वर्षे पूर्ण पगार आणि सवलती घेऊन पालिकेची आर्थिक फसवणूक केल्याप्रकरणी पालिकेने त्यांना नुकतीच ‘कारणे दाखवा नोटीस’ बजावली आहे. आयुक्त डॉ. रामास्वामी एन. यांनी याआधीच त्यांची ऐरोली रुग्णालयात बदली केली आहे.

डॉ. वसंत माने सन २००७मध्ये नवी मुंबई महापालिका आरोग्य विभागात अपघात वैद्यकीय अधिकारी म्हणून रुजू झाले. यानंतर २०१४मध्ये ‘कॉलेज ऑफ फिजिशियन अॅण्ड सर्जन, परळ’ यांच्याकडून दोन वर्षांची डिप्लोमा इन पब्लिक हेल्थ (डीपीएच) पदविका मिळविल्याची नोंद महापालिकेच्या सेवा पुस्तिकेत त्यांनी केली आहे. महापालिकादफ्तरी डीपीएच ही अतिरिक्त शैक्षणिक पात्रता म्हणून नोंद झाल्यानंतर डॉ. माने यांनी महापालिका मुख्यालयात बदली करून घेतली. डॉ. वसंत माने यांनी नागरी सेवा अधिनियमनानुसार दोन वर्षांचा डीपीएच पदविका कोर्स करताना महापालिकेकडून अध्ययन रजा घेणे बंधनकारक होते. परंतु, त्यांनी अध्ययन रजा घेतली नाही. तसेच, त्यांनी एकाच वेळी नवी मुंबई महापालिकेत आणि कॉलेज ऑफ फिजिशियन संस्थेत कोर्सलाही उपस्थिती दर्शवली. डॉ. माने कार्यालयीन कामकाजाच्या वेळेत महापालिकेत हजर आणि परळ येथील कॉलेजमध्ये लेक्चरलाही हजर असल्याचा अहवाल माने यांच्या सह्यांनिशी पालिकेला कळविल्यानंतर हा प्रकार उघड झाला आहे.

डॉ. वसंत माने यांनी हा कोर्स करताना महापालिकेत रजा घेतली नसल्याचे महापालिकेच्या दफ्तरी त्यांच्या रजेच्या नोंदीवरून स्पष्ट झाले आहे. एक व्यक्ती एकाच वेळी नवी मुंबई महापालिकेत ऑन ड्युटी आणि त्याचवेळी परळ येथे कॉलेजला कसा काय उपस्थित राहू शकतो? असा सवाल उपस्थित करत सेवानिवृत्त पालिका अधिकारी-कर्मचाऱ्यांनी डॉ. माने यांची चौकशी करून त्यांच्यावर कायदेशीर कारवाई करण्याची मागणी केली आहे.