म. टा. वृत्तसेवा, सटाणा
बागलाण तालुक्यातील मांगीतुंगी ऋषभदेवपुरम येथे २२ ते २४ ऑक्टोबरदरम्यान राष्ट्रपती रामनाथ कोविंद यांच्या प्रमुख उपस्थितीत विश्वशांती अहिंसा संमेलन सोहळा होणार आहे. या दौऱ्याच्या पार्श्वभूमीवर शनिवारी जिल्हाधिकारी बी. राधाकृष्णन व विशेष पोलिस महानिरीक्षक छेरिंग दोरजे यांनी राष्ट्रपतींच्या विशेष हेलिकॉप्टर व हेलिपॅडची चाचणी घेतली.
राष्ट्रपती कोविंद यांच्या हस्ते सोमवारी (ता. २०) दुपारी साडेतीनला उद्घाटन होणार आहे. केंद्रीय संरक्षण राज्यमंत्री डॉ. सुभाष भामरे, राज्यपाल सी. विद्यासागर राव, मुख्यमंत्री देवेंद्र फडणवीस, महसूलमंत्री चंद्रकांत पाटील, पालकमंत्री गिरीश महाजन, पर्यटनमंत्री जयकुमार रावल आदी उपस्थित राहतील. कार्यक्रमस्थळापासून काही अंतरावर साडेसात एकर जागेवर राष्ट्रपतींच्या ताफ्यातील तीन विशेष हेलिकॉप्टर उतरण्यासाठी हेलिपॅड तयार करण्यात आले आहे. जिल्हाधिकारी व पोलिस महानिरीक्षकांच्या निरीक्षणाखाली शनिवारी सकाळी ११ वाजता हेलिकॉप्टरची यशस्वी चाचणी घेण्यात आली.
जिल्हाधिकारी बी. राधाकृष्णन व विशेष पोलिस महानिरीक्षक दोरजे यांनी हेलिपॅड व सभामंडप या मार्गासह सभामंडप व व्यासपीठ परिसराची पाहणी केली. यानंतर ऋषभदेवपुरम सभागृहात जिल्हाधिकाऱ्यांच्या अध्यक्षतेखाली सर्व प्रशासकीय विभागप्रमुखांची बैठक झाली. या वेळी १०८ फूट मूर्ती निर्माण कमिटीचे अध्यक्ष पीठाधीश रवींद्रकीर्तीजी स्वामी, अधिष्ठाता सी. आर. पाटील, महामंत्री संजय पापडीवाल, जिल्हा पोलिसप्रमुख संजय दराडे, अप्पर पोलिस अधीक्षक नीलोत्पल, रागसुधा, बागलाणचे उपविभागीय अधिकारी प्रवीण महाजन, उपविभागीय पोलिस अधिकारी शशिकांत शिंदे, तहसीलदार प्रमोद हिले आदी उपस्थित होते. जिल्हाधिकारी राधाकृष्णन यांनी राष्ट्रपतींचा हा विशेष दौरा यशस्वी करण्यासाठी विभागप्रमुखांनी सतर्क राहावे. याबाबत कुणीही कुचराई केल्यास त्याच्यावर कारवाई करण्याचा इशाराही त्यांनी दिला. ट्रस्टचे विजय जैन, डॉ. जीवनप्रकाश जैन, चंद्रशेखर कासलीवाल, प्रमोद कासलीवाल, मुकेश जैन, अनिल जैन, भूषण कासलीवाल, प्रदीप जैन, अनिल ठोळे, सौरभ जैन, मनोज जैन, अंशुल मित्तल, दिलीप जैन, प्रदीप कांकरिया, किशोर भामरे आदी उपस्थित होते.