कुणाल लोंढे, पनवेल
महासत्ता म्हणून ओळखल्या जाणाऱ्या अमेरिकेला आज एक भारतीय तरुण कोड्यात टाकणार आहे. अमेरिकेच्या एका सुप्रसिद्ध वर्तमानपत्रात, आज गांधीजयंतीनिमित्त प्रसिद्ध होणारं शब्दकोडं तयार केलंय मंगेश घोगरे या तरुणानं. असा मान मिळवणारा तो पहिलाच भारतीय ठरला आहे.
आपण तयार केलेलं शब्दकोडं थेट अमेरिकेच्या 'न्यूयॉर्क टाइम्स'मध्ये प्रसिद्ध होणार असेल तर? नवी मुंबईच्या मंगेश घोगरे या तरुणानं हा मान पटकावला आहे. त्यानं तयार केलेलं शब्दकोडं आज, गांधीजयंतीचं औचित्य साधून 'न्यूयॉर्क टाइम्स' या जगप्रसिद्ध वर्तमानपत्रात छापून येणार आहे. त्याचं हे कोडं गांधीजींवर आधारित असणार आहे. त्यामुळे गांधीजयंतीच्या निमित्तानं भारतीयांसाठी ही अभिमानाची बाब ठरणार आहे.
नवी मुंबईचा रहिवासी असलेला मंगेश बँकिंग क्षेत्रात मोठ्या पदावर काम करतो. त्याला शब्दकोडी तयार करण्याचा छंद आहे. त्याची शब्दकोडी यापूर्वी जगप्रसिद्ध पेपरमध्ये प्रसिद्ध झाली आहेत. आपलं शब्दकोडं प्रतिष्ठेच्या मानल्या जाणाऱ्या 'न्यूयार्क टाइम्स'मध्ये प्रसिद्ध व्हावं अशी अनेक शब्दकोडंनिर्मात्यांची इच्छा असते. मंगेशची ही इच्छा पूर्ण होते आहे. पनवेलमधील महात्मा एज्युकेशन सोसायटीत मंगेशचं शिक्षण झालं. व्हीजेटीआय कॉलेजमधून इंजिनीअरिंग केल्यानंतर मंगेशनं एमबीए केलं. सध्या तो एका मोठ्या इन्व्हेस्टमेंट बँकेमध्ये नोकरी करतो. नोकरीच्या धावपळीत त्यानं शब्दकोड्यांच्या छंदाकडे दुर्लक्ष केलं नाही. अमेरिकेच्या स्वातंत्र्यदिनी मंगेशनं तयार केलेलं कोडं प्रसिद्ध झालं होतं. जगातल्या सर्वात जुन्या आणि बड्या दैनिकात शब्दकोडं प्रसिद्ध होणारा तो पहिला भारतीय असल्याचं या दैनिकानं म्हटलं आहे.
मोठा बहुमान
आजवर त्याची शब्दकोडी वॉल स्ट्रिट जर्नल, लॉस एंजेलिस टाइम्समध्ये प्रसिद्ध झाली आहेत. अमेरिकेत होणाऱ्या अमेरिकन शब्दकोडी स्पर्धांमध्ये तो सहभागी झाला आहे. जगभरात कोट्यवधी वाचक असलेल्या वर्तमानपत्रात अमेरिकेच्या स्वातंत्र्यदिनी भारतीय तरुणाचं शब्दकोडं प्रसिद्ध होणं हा आपल्या देशाचा बहुमानच होता. यानंतर मंगेशला 'भारतासाठी आपण काय करू शकता' अशी विचारणा झाली. त्यामुळे जगभरात 'महात्मा' अशी ओळख असलेल्या गांधीजींवर आधारित शब्दकोडं तयार करण्याचं मंगेशनं ठरवलं. नोव्हेंबर २०१८ साली त्यानं गांधीजींशी संबंधित शब्दांवर आधारित कोडं रचलं. तुमचं शब्दकोडं २ ऑक्टोबरला प्रसिद्ध करण्यात येईल अशी माहिती त्याला फेब्रुवारी महिन्यात इमेलवर देण्यात आली. गेली २६ वर्षं त्या वर्तमानपत्रासाठी शब्दकोड्यांची निवड करणाऱ्या शॉर्टझ यांनी हे कळवलं. आजवर एकाही भारतीयाचं शब्दकोडं आमच्या दैनिकात प्रसिद्ध झालं नसल्याचं त्यानं सांगितलं आहे.
पत्नीचाही वाटा
आपल्या या यशात पत्नी रुपाली घोगरेचाही महत्त्वाचा वाटा असल्याचं मंगेश सांगतो. 'जगभरात धर्मवाद, जातीयवाद, दहशतवाद पसरत असताना माझ्या शब्दकोड्याच्या निमित्तानं जगभरातले कोट्यवधी लोक गांधीजींची आठवण काढतील. गांधीजीविषयी त्यांना प्रश्न पडतील ही बाब माझ्यासाठी महत्त्वाची आहे. या निमित्तानं गांधीजींच्या कार्याचा प्रसार करण्यात मी थोडासा हातभार लावू शकलो असं मला वाटतं', असं मंगेशनं सांगितलं.
जगभरातून दररोज १५० कोडी त्यांच्याकडे येत असतात. त्यांनी महात्माजींच्या जयंतीच्या निमित्तानं यावर्षी दोन ऑक्टोबरला माझं शब्दकोडं प्रसिद्ध करावं हा माझ्यासाठी खूप मोठा मान आहे. - मंगेश घोगरे
महासत्ता म्हणून ओळखल्या जाणाऱ्या अमेरिकेला आज एक भारतीय तरुण कोड्यात टाकणार आहे. अमेरिकेच्या एका सुप्रसिद्ध वर्तमानपत्रात, आज गांधीजयंतीनिमित्त प्रसिद्ध होणारं शब्दकोडं तयार केलंय मंगेश घोगरे या तरुणानं. असा मान मिळवणारा तो पहिलाच भारतीय ठरला आहे.
आपण तयार केलेलं शब्दकोडं थेट अमेरिकेच्या 'न्यूयॉर्क टाइम्स'मध्ये प्रसिद्ध होणार असेल तर? नवी मुंबईच्या मंगेश घोगरे या तरुणानं हा मान पटकावला आहे. त्यानं तयार केलेलं शब्दकोडं आज, गांधीजयंतीचं औचित्य साधून 'न्यूयॉर्क टाइम्स' या जगप्रसिद्ध वर्तमानपत्रात छापून येणार आहे. त्याचं हे कोडं गांधीजींवर आधारित असणार आहे. त्यामुळे गांधीजयंतीच्या निमित्तानं भारतीयांसाठी ही अभिमानाची बाब ठरणार आहे.
नवी मुंबईचा रहिवासी असलेला मंगेश बँकिंग क्षेत्रात मोठ्या पदावर काम करतो. त्याला शब्दकोडी तयार करण्याचा छंद आहे. त्याची शब्दकोडी यापूर्वी जगप्रसिद्ध पेपरमध्ये प्रसिद्ध झाली आहेत. आपलं शब्दकोडं प्रतिष्ठेच्या मानल्या जाणाऱ्या 'न्यूयार्क टाइम्स'मध्ये प्रसिद्ध व्हावं अशी अनेक शब्दकोडंनिर्मात्यांची इच्छा असते. मंगेशची ही इच्छा पूर्ण होते आहे. पनवेलमधील महात्मा एज्युकेशन सोसायटीत मंगेशचं शिक्षण झालं. व्हीजेटीआय कॉलेजमधून इंजिनीअरिंग केल्यानंतर मंगेशनं एमबीए केलं. सध्या तो एका मोठ्या इन्व्हेस्टमेंट बँकेमध्ये नोकरी करतो. नोकरीच्या धावपळीत त्यानं शब्दकोड्यांच्या छंदाकडे दुर्लक्ष केलं नाही. अमेरिकेच्या स्वातंत्र्यदिनी मंगेशनं तयार केलेलं कोडं प्रसिद्ध झालं होतं. जगातल्या सर्वात जुन्या आणि बड्या दैनिकात शब्दकोडं प्रसिद्ध होणारा तो पहिला भारतीय असल्याचं या दैनिकानं म्हटलं आहे.
मोठा बहुमान
आजवर त्याची शब्दकोडी वॉल स्ट्रिट जर्नल, लॉस एंजेलिस टाइम्समध्ये प्रसिद्ध झाली आहेत. अमेरिकेत होणाऱ्या अमेरिकन शब्दकोडी स्पर्धांमध्ये तो सहभागी झाला आहे. जगभरात कोट्यवधी वाचक असलेल्या वर्तमानपत्रात अमेरिकेच्या स्वातंत्र्यदिनी भारतीय तरुणाचं शब्दकोडं प्रसिद्ध होणं हा आपल्या देशाचा बहुमानच होता. यानंतर मंगेशला 'भारतासाठी आपण काय करू शकता' अशी विचारणा झाली. त्यामुळे जगभरात 'महात्मा' अशी ओळख असलेल्या गांधीजींवर आधारित शब्दकोडं तयार करण्याचं मंगेशनं ठरवलं. नोव्हेंबर २०१८ साली त्यानं गांधीजींशी संबंधित शब्दांवर आधारित कोडं रचलं. तुमचं शब्दकोडं २ ऑक्टोबरला प्रसिद्ध करण्यात येईल अशी माहिती त्याला फेब्रुवारी महिन्यात इमेलवर देण्यात आली. गेली २६ वर्षं त्या वर्तमानपत्रासाठी शब्दकोड्यांची निवड करणाऱ्या शॉर्टझ यांनी हे कळवलं. आजवर एकाही भारतीयाचं शब्दकोडं आमच्या दैनिकात प्रसिद्ध झालं नसल्याचं त्यानं सांगितलं आहे.
पत्नीचाही वाटा
आपल्या या यशात पत्नी रुपाली घोगरेचाही महत्त्वाचा वाटा असल्याचं मंगेश सांगतो. 'जगभरात धर्मवाद, जातीयवाद, दहशतवाद पसरत असताना माझ्या शब्दकोड्याच्या निमित्तानं जगभरातले कोट्यवधी लोक गांधीजींची आठवण काढतील. गांधीजीविषयी त्यांना प्रश्न पडतील ही बाब माझ्यासाठी महत्त्वाची आहे. या निमित्तानं गांधीजींच्या कार्याचा प्रसार करण्यात मी थोडासा हातभार लावू शकलो असं मला वाटतं', असं मंगेशनं सांगितलं.
जगभरातून दररोज १५० कोडी त्यांच्याकडे येत असतात. त्यांनी महात्माजींच्या जयंतीच्या निमित्तानं यावर्षी दोन ऑक्टोबरला माझं शब्दकोडं प्रसिद्ध करावं हा माझ्यासाठी खूप मोठा मान आहे. - मंगेश घोगरे