नवी मुंबई पोलिसांची कारवाई
म. टा. वृत्तसेवा, नवी मुंबई
पालघर येथे जमावाकडून झालेल्या दोन साधूंच्या हत्येच्या घटनेचा व्हिडीओ फेसबुकवर शेअर करून दोन वर्गामध्ये द्वेषभाव निर्माण करण्याचा तसेच महाराष्ट्र सरकारची बदनामी करणारी आक्षेपार्ह पोस्ट टाकल्याप्रकरणी खारघर येथे राहणाऱ्या महिलेविरोधात पोलिसांनी गुन्हा दाखल केला आहे.
खारघरमध्ये राहणाऱ्या तृप्ती देसाई हिने व्हिडीओ शेअर करतानाच जातीय तेढ निर्माण करणारी आक्षेपार्ह पोस्टही केली आहे.
त्यावर काही व्यक्तींनी कमेंट्स देताना विशिष्ट समाजाला आरोपीच्या पिंजऱ्यामध्ये उभे करून धार्मिक तेढ निर्माण करण्याचा प्रयत्न केल्याचेही आढळून आले. याबाबतची माहिती नवी मुंबई पोलिसांच्या सायबर सेलला मिळाल्यानंतर सायबर सेलने तिचा शोध घेतला असता, तृप्ती देसाई ही महिला खारघरमध्ये रहात असल्याचे तसेच ती इन्शुरन्स एजंट असल्याची माहिती मिळाली.
खारघर पोलिसांनी या प्रकरणात स्वत: फिर्यादी होऊन तृप्ती देसाई या महिलेवर आयटी अॅक्टसह इतर कलमांन्वये गुन्हा दाखल केला आहे.