म. टा. विशेष प्रतिनिधी, मुंबई
केरळमधील पूरग्रस्तांच्या मदतीसाठी मुख्यमंत्री, मंत्री, राज्यमंत्री व आमदारांचे एक दिवसाचे वेतन मुख्यमंत्री सहाय्यता निधी जमा केले जाणार असून, राज्य सरकारी कर्मचारी आणि अधिकाऱ्यांच्या सप्टेंबर महिन्याच्या वेतनातून एक दिवसाचे वेतन या सहाय्यता निधीला दिले जाणार आहे. याबाबतचा शासन निर्णय सामान्य प्रशासन विभागाने सोमवारी जारी केला.
महाराष्ट्र सरकारने केरळसाठी २० कोटी रुपयांचे अर्थसहाय्य घोषित केले आहे. वैद्यकीय शिक्षणमंत्री गिरीष महाजन यांच्या नेतृत्वाखाली वैद्यकीय पथकही केरळला पाठविले होते. औषधे, वैद्यकीय सहाय्यता, कपडे, अन्नाची पाकिटे, अन्नधान्य आदी मदत महाराष्ट्राने दिली आहे. राज्य सरकारमधील अधिकारी-कर्मचाऱ्यांनी आपले एक दिवसाचे वेतन केरळ पूरग्रस्तांसाठी दिले आहे. भारतीय प्रशासकीय सेवा, भारतीय पोलिस सेवा, भारतीय वन सेवेतील अधिकाऱ्यांसह राज्य सरकार, निमशासकीय संस्था, जिल्हा परिषद, पंचायत समिती, महापालिका, नगरपालिका, सार्वजनिक उपक्रमात असलेल्या अधिकारी आणि कर्मचाऱ्यांच्या सप्टेंबर, २०१८ या महिन्याच्या वेतनातून एक दिवसाचे वेतन वजा केले जाणार आहे. कर्मचाऱ्यांसह सेवानिवृत्त कर्मचाऱ्यांच्या निवृत्ती वेतनातून एक दिवसाचे वेतन कपात करण्यात येणार आहे. ज्या अधिकारी-कर्मचाऱ्यांना एक दिवसाच्या या वेतन कपातीला हरकत असेल त्यांनी तसे पत्र विभागप्रमुखाला द्यावे. पत्र देणाऱ्या अधिकारी-कर्मचाऱ्यांच्या वेतनातून कपात करण्यात येऊ नये, असे शासन निर्णयात नमूद केले आहे.