यंदाही पांडवकडा पर्यटकांसाठी बंदच!

पनवेल : पावसाळी पर्यटनाचे मुख्य आकर्षण राहिलेल्या खारघरमधील पांडवकड्याचे निसर्गप्रेमींना दुरूनच दर्शन घ्यावे लागणार आहे. सुरक्षितेतच्या कारणामुळे पांडवकड्यावर जाण्यासाठी यंदाही प्रवेशबंदी करण्याचा निर्णय वनविभागाने घेतला आहे.

पांडवकडा धबधब्यावर वनविभागाने घातलेली बंदी मोडून दरवर्षी हजारो पर्यटक मौजमजा करतात. मात्र येथे अनेकांचा मृत्यू झाल्याने गेल्या काही वर्षांपासून वनविभागाने पर्यटकांना धबधब्याखाली जाण्यास बंदी घातली. यावर्षीही ही बंदी कायम ठेवण्यात आली. पर्यटकांच्या सुरक्षेसाठीच हा निर्णय घ्यावा लागल्याचे वनविभागाचे अधिकारी डी. एस. सोनावणे यांनी सांगितले. पांडवकड्याचे पाणी वाहून येणाऱ्या आवश्यक ठिकाणी संरक्षक भिंत, बंधारा बांधण्याचे काम पूर्ण झाल्यानंतर बंदी उठविण्याचा विचार वनविभाग करण्याची शक्यता आहे.

खारघर हिलवरही बंदी

खारघर शहराला लागून असलेल्या खारघर हिल या डोंगरावर जाण्यासही बंदी घालण्यात आली आहे. शहराचे विहंगम दृश्य पाहण्यासाठी पर्यटक हिलवर जातात. मात्र पांडवकड्यासोबत हिलवरही बंदी आणल्यामुळे निसर्गप्रेमींचा हिरमोड झाला.