पनवेल महापालिका बोधचिन्हासाठी स्पर्धा

पनवेल महापालिकेचा निर्णय

म. टा. वृत्तसेवा, पनवेल

महापालिकेचे चिन्ह बनविण्यासाठी पनवेल महापालिकेने गुरुवारी राष्ट्रीय स्पर्धा जाहीर केली. नव्याने स्थापन केलेल्या पनवेल महापालिकेची ओळख महापालिकेच्या चिन्हातून मिळणार आहे. गुरुवारपासून ही स्पर्धा सर्वांसाठी खुली झाली असून भारतातील कोणीही नागरिक चिन्ह तयार करण्यासाठी सहभागी होऊ शकतो.

१ ऑक्टोबर २०१६ रोजी महापालिकेची स्थापना झाल्यापासून महापालिकेची जडणघडण सुरू आहे. महापालिकेच्या पहिल्या निवडणुका झाल्यानंतर लवकरच महापालिकेचा कारभार लोकप्रतिनिधींच्या हाती द्यायचा आहे. सध्या प्रशासक म्हणून महापालिकेची सूत्रे आयुक्त डॉ. सुधाकर शिंदे यांच्या हातात आहेत. २६ मे रोजी महापालिकेचा निकाल जाहीर झाला. बहुमताने सत्ता स्थापन करू शकतात इतके नगरसेवक भाजपचे निवडून आले आहेत. त्यामुळे प्रशासनाने युद्धपातळीवर काम सुरू केले आहे. महापौर उपमहापौरांची निवड होण्यापूर्वी तांत्रिक बाबी पूर्ण करण्यासाठी प्रशासनाची धावपळ सुरू आहे. यातील महत्त्वाचा भाग म्हणजे महापालिकेची भविष्यात कायमस्वरूपी ओळख निर्माण करणाऱ्या महापालिका बोधचिन्हासाठी महापालिकेने स्पर्धेतून निवड करण्याचे ठरविले आहे. १५० वर्षांहून जुनी नगरपालिका बरखास्त होऊन राज्यातील २७ पनवेल महापालिकेची स्थापना झाली. कोकणचे प्रवेशव्दार, मुंबई पुण्याचा मध्य, आंतरराष्ट्रीय विमानतळ, औद्योगिकीकरण अशी सगळी ओळख सांगणा-या पनवेल महापालिकेचे बोधचिन्ह बनविण्यासाठी स्पर्धां घेतली आहे.

१ जुलैपर्यंत बोधचिन्ह जमा करायचे असल्याने केवळ आठ दिवसांत कलाकारांनी चिन्ह बनवावे, असे आवाहन करण्यात आले आहे. कोणीही १८ वर्षांवरील भारतीय नागरिक, व्यक्ती, समूह स्पर्धेत सहभागी होऊ शकतो. चार चौरस सेमीमध्ये चिन्ह बनवायचे आहे. महापालिकेचे बोधचिन्ह जास्तित जास्त चांगले व्हावे, आकर्षित असावे म्हणून स्पर्धेच्या माध्यमातून बनविण्याचे ठरविले असल्याचे डॉ. सुधाकर शिंदे यांनी सांगितले. Panvelcorporation@gmail.com या मेल आयडीवर बोधचिन्ह जेपीईजी, जेपीजी, पीएनजी, एसव्हीजी या फॉन्टमध्ये पाठवायचे आहे. स्पर्धकाने स्वत:ची संपtर्ण माहिती फोटोसह मेल करायचr आहे. जास्तrत जास्त कलाकारांनी महापालिका लोगो बनविण्याच्या स्पर्धेत सहभागी होण्याचे आवाहन आयुक्तांनी केले आहे.

प्रथम पारितोषिक २५ हजार रुपये

महापालिकेची ओळख सांगणारे बोधचिन्ह ज्याचे निवडले जाईल त्याला महापालिकेने प्रथम क्रमांकासाठी २५ हजार रुपयांचे पारितोषिक ठेवले आहे. त्यानंतर पाच उपविजेत्यांना प्रत्येक पाच हजार रुपये दिले जाणार आहेत. या स्पर्धेचा निकाल महापालिकेच्या वेबसाइटवर जाहीर केला जाईल.