करवसुलीचा व्याप!

पनवेलमध्ये ४२ हजार मालमत्ता; कर विभागात अवघे चार कर्मचारी

कुणाल लोंढे, पनवेल

नगरपालिका संपुष्टात येऊन पनवेल महापालिकेची स्थापना झाली आण‌ि महापालिकेच्या स्थापनेमुळे कामाची व्याप्तीही वाढली. मात्र असे असूनही महापालिकेत कर्मचारीसंख्या अपुरी आहे. अपुऱ्या कर्मचारीसंख्येचा फटका कर विभागाला बसला आहे. पनवेल शहरातील ४२ हजार मालमत्तांसाठी केवळ चार कर्मचारी उरले आहेत. त्यामुळे कर्मचाऱ्यांवर कामाचा ताण अनेक पटींनी वाढला आहे.

पनवेल नगरपालिकेचे भौगोलिक क्षेत्रफळ केवळ तीन चौरस किलोमीटर होते. या भागात पूर्वी ४२ हजार मालमत्ता होत्या. आता महापालिकेच्या क्षेत्रफळात अनेक पटींनी वाढ झाली आहे. नगरपालिकेत ४२ हजार मालमत्तांकडून कर वसूल करण्यासाठी एक कर अधिक्षक आणि २४ विविध कर्मचारी काम करीत होते. महापालिकेच्या स्थापनेनंतर या २५ जणांपैकी २१ कर्मचाऱ्यांना वेगवेगळ्या ठिकाणी कामासाठी घेतल्यामुळे प्रत्यक्षात शहराचे काम करण्यासाठी अवघे चार कर्मचारी उरले आहेत. सिडको हद्दीतील मालमत्तांचे सर्वेक्षण केल्यास भविष्यात अडीच ते तीन लाख मालमत्ता उभ्या राहणार असल्याची शक्यता आहे. त्यावेळेला १०० क्लार्कची आवश्यकता लागणार आहे. महापालिकेचा आकृतीबंध बनविण्याचे काम अजूनही संथगतीने असल्याने सध्या कामगारांवर कामाचा ताण वाढला आहे. पनवेल शहरात चार कर्मचारी काम करीत असल्यामुळे वसुली रखडल्याचे सांगण्यात येत आहे.

करवसुली हादेखील महापालिकेतील सर्वात महत्त्वाचा भाग आहे, मात्र सध्या महापालिकेतील वरिष्ठांनी या विभागाकडे दुर्लक्ष केले आहे. एक व्यक्तीला १० ते १५ हजार मालमत्तांची जबाबदारी संभाळावी लागत असल्याने कर्मचारी कामाच्या ओझ्याने वाकले आहेत. आकृतीबंध आल्यावर कर्मचाऱ्यांची संख्या वाढेल तेव्हा वाढेल, सध्या मात्र आमच्यावर किती ओझे टाकायचे?, अशी व्यथा हे कर्मचारी दबक्या आवाजात बोलत आहेत. शिवाय, ही कर्मचारीसंख्या अपुरी असल्याचा फटका कर विभागात वेगवेगळ्या कामासाठी महापालिकेत आलेल्या नागरिकांनाही सहन करावा लागत आहे. एखादा कर्मचारी सुटीवर असला की नागरिकांना खेटे घालावे लागतात.

कर अधीक्षक नगरसचिव

कर विभागात काम करणाऱ्या कामगारांचीच ही अवस्था नसून महापालिकेचे नगरसचिव म्हणून करअधीक्षक अनिल जगधनी यांच्यावर जबाबदारी देण्यात आली आहे. त्यामुळे सध्या त्यांना कर विभाग सांभाळून महत्त्वाचे समजले जाणारे नगरसचिवपद सांभाळण्याची कसरत करावी लागत आहे.

महापालिकेत काम वाढले आहे, मात्र कर्मचारी आहे तेवढाच आहे, कर विभागातील पूर्वीचे कर्मचारी महापालिकेच्या कामासाठी अन्य ठिकाणी स्थलांतरित झाले आहेत. महापालिकेच्या आकृतीबंधाचे काम सुरू असून त्याला मंजुरी मिळाल्यास कर्मचाऱ्यांची भरती केली जाईल.

अनिल जगधनी, कर अधीक्षक