पालिकेच्या लिपिकांची टंकलेखन परीक्षा

कुणाल लोंढे, पनवेल

पनवेल महापालिकेत असलेल्या अनेक लिपिकांना इंग्लिश आणि मराठी टायपिंग जमत नसल्यामुळे सध्या प्रशासनाला कामात अडथळे येत आहेत. त्यामुळे प्रशासनाने पालिकेतील १०० लिपिकांची चाचणी परीक्षा घेण्याचे ठरविले आहे. या परीक्षेत अनुत्तीर्ण झालेल्या लिपिकांना शिक्षेला सामोरे जावे लागणार आहे. काही लिपिकांनी परीक्षेच्या धास्तीने पुन्हा क्लास सुरू केले आहेत.

पनवेल महापालिकेचे कामकाज आवश्यकतेपेक्षा निम्म्याहून कमी कर्मचाऱ्यांसह सुरू आहे. महापालिकेत नगरपालिकेत असलेले आणि ग्रामपंचायतीतून महापालिकेत आलेले लिपिक काम करतात. तसेच, महापालिकेने कंत्राट पद्धतीने डेटा एण्ट्री ऑपरेटरही भरले आहेत. मात्र पालिकेत कायमस्वरूपी असलेल्या लिपिकांनाच इंग्लिश, मराठी टंकलेखन जमत नसल्यामुळे प्रशासनाला अडथळे येत आहेत. लिपिक टंकलेखनपदासाठी प्रचलित सरकारी सेवा प्रवेश नियमाप्रमाणे घेण्यात येणारी इंग्रजी ४० व मराठी ३० शब्द असे प्रति प्रतिमिनिट वेग असावा लागतो. परंतु सध्या महापालिकेतील लिपिकांना कम्प्युटरवर टंकलेखन करता येत नसल्याचे प्रशासनाच्या निदर्शनास आले आहे. त्यामुळे लिपिकांची टंकलेखनाची चाचणी परीक्षा घेण्याचा निर्णय प्रशासनाने घेतला आहे. महापालिका उपायुक्त जमीर लेंगरेकर यांनी या निर्णयाचे परिपत्रक काढून सर्व विभागप्रमुखांना कळविले आहे.

बढती थांबू शकते
महापालिकेत काम करताना अनेक लिपिकांना आवश्यक वेगानुसार टंकलेखन करता येत नसल्याचे वारंवार समोर आले आहे. चाचणी परीक्षेत अनुत्तीर्ण झाल्यास लिपिकांना आवश्यक टंकलेखन जमत नसल्यास त्यांची बढतीही थांबू शकते. ज्या पदाचा पगार घेतात ते काम त्यांना जमलेच पाहिजे, असे मत उपायुक्त जमीर लेंगरेकर यांनी ‘मटा’ला सांगितले.