उमेदवारांचा मॉर्निंग वॉक प्रचार

म. टा. वृत्तसेवा, पनवेल

अवघ्या पाच दिवसांवर मतदानाचा दिवस येऊन ठेपल्यामुळे एकही मिनिट वाया न घालवता उमेदवार मतदारांपुढे हात जोडण्यासाठी घरोघरी फिरत आहे. प्रत्यक्ष गाठीभेटी, प्रचार रॅली, सोशलमीडिया, जाहीर सभा अशा वेगवेगळ्या माध्यमांतून लोकांपर्यंत पोहोचण्यासाठी उमेदवारांची धडपड सुरू आहे. प्रभाग क्रमांक १५मधील भाजपच्या उमेदवारांनी एक पाऊल पुढे जात पहाटे मॉर्निंग वॉकला जाणाऱ्या मतदारांना गाठून आम्हाला मते देण्याची विनंती केली.

भाजपचे प्रचारतंत्र प्रभावशाली ठरले असल्याचे मागील अनेक निवडणुकांत दिसून आले. त्यामुळे भाजप वेगवेगळ्या माध्यमातून लोकांपर्यंत पोहचण्याचा प्रयत्न करीत आहे. भाजपचे प्रभाग क्रमांक ५मधील उमेदवार संजय भोपी यांनी पहाटे सहा वाजता प्रचाराला सुरुवात केली. त्यांच्यासोबत भाजपच्या उमेदवार सीता पाटील यादेखील उपस्थित होत्या. भल्या पहाटे खांदा वसाहतीतील विविध बागेंमधील योगा, मॉर्निंग वॉक करणाऱ्या नागरिकांनी आश्चर्य व्यक्त केले. तर, घराचे दरवाजे वाजवून परेशान केलेले अनेक नागरिकांच्या कपाळावर आट्या आल्या. आम्ही प्रभाग १५चे उमेदवार. आम्हाला निवडून द्या, अशी विनंती हात जोडून करीत होते. उमेदवार मतदारांपर्यंत पोहचण्यासाठी काय काय फंडे वापरतील याचा नेम नाही, अशी प्रतिक्रिया या प्रचाराची माहिती सांगणाऱ्या एक मतदाराने नाव न सांगण्याच्या अटीवर सांगितले. संजय भोपी यांचा मॉर्निंग वॉक योगा ग्रुप असून संजय भोपी सोशल क्लबदेखील आहे. त्यामुळे पहाटे फिरायला येणाऱ्या मतदारांवर डोळा ठेवून त्यांनी मॉर्निंग वॉक प्रचार केला.