महापौरांना अखेर उपायुक्तांचे दालन

प्रशासनाकडून तातडीने व्यवस्था

म. टा. वृत्तसेवा, पनवेल

महानगरपालिकेत महापौर, उपमहापौरांना बसण्यासाठी दालन नसल्यामुळे त्यांनी बसायचे कुठे, असा प्रश्न उपस्थित झाला होता. महापौरांना बसण्यासाठी दालन नसल्याची चर्चा सुरू होताच प्रशासनाने उपायुक्तांची दालने रिकामी करून महापौरांना जागा उपलब्ध करून दिली. ‘मटा’ने ही बातमी गुरुवारी प्रसिद्ध केली होती. गुरुवारी महापौर डॉ. कविता चौतमोल यांनी महापालिकेत जाऊन महापालिकेचा कारभार सुरू झाला असल्याचा संदेश दिला.

पनवेल महानगरपालिकेच्या महापौर, उपमहापौरांची निवड झाली तरी महापालिकेत त्यांच्यासाठी दालने बनविण्याचे काम सुरू होते. युद्धपातळीवर काम करूनही दालने बनविण्याचे काम अजूनही सुरू आहे. महापौर-उपमहापौरांची निवड होऊनही त्यांना बसण्यासाठी दालने नाहीत. याची चर्चा सुरू झाल्यानंतर प्रशासनाने हालचालींना सुरुवात केली. महापालिकेतील उपायुक्त आण‌ि नगरसचिवांची दालने रिकामे करून अनुक्रमे महापौर आणि उपमहापौरांना बसण्याची व्यवस्था केली. गुरुवारी सकाळी ११ वाजता महापौर डॉ. कविता चौतमोल व उपमहापौर चारूशिला घरत यांनी पहिल्यांदा महापालिकेत येऊन औपचारिकरीत्या पदभार स्वीकारला. महापौरपदाची निवड झाल्यानंतर लोकप्रतिनिधी सभागृहात आले नव्हते. महापौरांचे स्वागत महापालिका उपायुक्त जमीर लेंगरेकर व सहाय्यक आयुक्त संतोष पोशेट्टी यांनी पुष्पगुच्छ देऊन केले. जमिर लेंगरेकर यांनी लोकप्रतिनिधी आणि प्रशासन एका रथाची दोन चाके आहेत. हातात हात घालून काम केल्याशिवाय महापालिकेच्या माध्यमातून चांगल्या पद्धतीने काम करता येईल, असे मत यावेळी व्यक्त केले. नगरसेवक जगदिश गायकवाड यांनी ‘महापौरांना राज्यमंत्र्याच्या दर्जा असतो. प्रोटोकॉलप्रमाणे तुम्ही त्यांची व्यवस्था केली पाहिजे. लवकरात लवकर दालने बनवून द्या, अन्यथा आयुक्तांच्या दालनात आम्ही बसू’, असे ते म्हणाले.

आज महानगरपालिकेत येऊन आम्ही महानगरपालिकेचा कारभार सुरू केला आहे. ठराविक वेळेत यापुढे दररोज महापालिकेत बसणार आहोत. नागरिकांना विविध प्रश्नांसाठी भेट घेता येईल. सामान्य नागरिकांचे प्रश्न सोडविण्यासाठी महापालिका कटीबद्ध आहे.

- डॉ. कविता चौतमोल, महापौर