म. टा. वृत्तसेवा, नवी मुंबई
वाहतुकीच्या विरुद्ध दिशेने मोटारसायकल चालवित येणाऱ्या तरुणाला वाहतूक पोलिसांनी अडविल्याने या तरुणाने आपल्या सहकाऱ्याला त्याठिकाणी बोलावून वाहतूक पोलिसांना धक्काबुक्की केल्याची घटना मंगळवारी दुपारी तळोजा येथे घडली. फुरकान नबी हसन अली (२६) आणि मेहमुद मकबुल अहमद मलीक (३२) अशी या दोघांची नावे असून तळोजा पोलिसांनी या दोघांवर सरकारी कामकाजात अडथळा निर्माण केल्याप्रकरणी गुन्हा दाखल करून दोघांना अटक केली आहे. तसेच त्यांची वाहने जप्त केली आहेत. न्यायालयाने दोघांना येत्या शनिवारपर्यंत पोलिस कोठडी ठोठावली आहे.