म. टा. खास प्रतिनिधी, मुंबई
पश्चिम रेल्वेवरील एल्फिन्स्टन रोड या उपनगरी रेल्वे स्थानकाचे नाव प्रभादेवी असे होण्यास वर्षभरापूर्वी मंजुरी मिळाली असताना या नामांतरासाठी विशेष सोहळा आयोजित केला जाईल, ही अटकळ फोल ठरली आहे. एक वर्षापूर्वी पश्चिम रेल्वेने परिपत्रक काढून नामांतराची घोषणा केली होती. त्यासाठी केंद्र, राज्य सरकारकडूनही संमती देण्यात आली होती. राज्य सरकारने त्यासाठी लगोलग अधिसूचनाही काढली होती. या पार्श्वभूमीवर, आता वर्षभरानंतर एल्फिन्स्टन रोड स्थानकावर उद्या, बुधवारी मध्यरात्रीपासून 'प्रभादेवी' या नामफलकाचे दर्शन मुंबईकरांना होणार आहे!
त्यापूर्वी पश्चिम रेल्वेने नामांतराच्या अनुषंगाने तिकीट यंत्रणेसह, इंडिकेटर, उद्घोषणा आदींसंदर्भात सर्व तयारी केली होती. पण, त्याची अमलबजावणी झाली नाही. गर्व्हनर लॉर्ड एल्फिन्स्टन यांच्या नावावरून या स्थानकाचे नाव एल्फिन्स्टन रोड ठेवण्यात आले होते. त्यानंतर गतवर्षी जूनमध्ये नामांतराची घोषणा झाली होती. प्रभादेवी स्थानकाचा कोड आता पीबीएचडी राहणार आहे.
सीएसएटी स्थानकाचा छत्रपती शिवाजी महाराज टर्मिनस या नामोल्लेखाप्रमाणेच एल्फिन्स्टन स्थानकाच्या नामांतराची मागणी शिवसेनेने केली होती. राज्य सरकारच्या मंजुरीनंतर हा प्रस्ताव केंद्र सरकारकडे पाठवण्यात आला. केंद्र सरकारने जून २०१७ मध्ये त्यासंदर्भात अधिसूचना जारी केली. त्यानंतर छत्रपती शिवाजी महाराज टर्मिनस या संपूर्ण नामोल्लेखाप्रमाणेच प्रभादेवी नामांतरास मंजुरी मिळाली.