म. टा. वृत्तसेवा, पनवेल
पनवेल महापालिकेच्या सभापतिपदी शनिवारी सत्ताधारी भाजपाचे नगरसेवक प्रविण पाटील यांची बिनविरोध निवड झाली. संख्याबळ नसतानाही शेकापचे नगरसेवक बबन मुकादम यांनी भरलेला उमेदवारी अर्ज माघार घेतल्यामुळे ही निवडणूक बिनविरोध झाली.
मावळते सभापती मनोहर म्हात्रे यांचा एक वर्षाचा कार्यकाळ संपल्यामुळे पनवेल महालिकेच्या स्थायी समिती सभापतिपदाची निवडणूक घेण्यात आली. गुरुवारी या पदासाठी अर्ज दाखल करण्यात आले. खारघरमधील नगरसेवक प्रवीण पाटील यांनी या पदासाठी अर्ज दाखल केला होता. तर, विरोधी पक्षाकडून नगरसेवक बबन मुकादम यांनी अर्ज दाखल केला होता. मात्र स्थायी समितीत सत्ताधारी पक्षाचे दहा सदस्यांचे संख्याबळ जास्त असल्यामुळे प्रवीण पाटील सभापती होणार हे निश्चित होते. पीठासन अधिकाऱ्यांच्या उपस्थितीत बबन मुकादम यांनी निवडणूक अर्ज मागे घेतल्यामुळे शनिवारी मतदान न होताच निवडणूक पार पडली. मात्र निवडणूक प्रक्रियेच्या वेळी स्थायी समितीचे सदस्य आणि विरोधी पक्षनेते प्रीतम म्हात्रे उपस्थित नसल्यामुळे चर्चेचा विषय ठरला. सत्ताधाऱ्यांनी त्यांच्या अनुपस्थितीची खिल्ली उडवित विरोधी पक्षाच्या नगरसेवकांना डिवचण्याचा प्रयत्न केला. विरोधी पक्षाचे सहापैकी दोन नगरसेवक अनुपस्थित असल्यामुळे आम्ही तुमचे नगरसेवक फोडले नाही, असे बोलून सभागृह नेते रेश ठाकूर यांनी सभागृहात कोपरखळी मारली. पीठासन अधिकारी म्हणून मुंबईचे जिल्हाधिकारी शिवाजी जोंधळे यांनी काम पाहिले.