म. टा. प्रतिनिधी, मुंबई,
विधानपरिषदेच्या आगामी स्थानिक स्वराज्य संस्था आणि पदवीधर मतदारसंघातील निवडणुका आघाडीत लढण्याबाबत काँग्रेसचे प्रदेशाध्यक्ष अशोक चव्हाण यांच्याशी आपली सकारात्मक चर्चा झाली असून आघाडी करण्याची आमची तयारी आहे, असे राष्ट्रवादी काँग्रेसचे प्रदेशाध्यक्ष सुनिल तटकरे यांनी शनिवारी पत्रकारांना सांगितले. तसेच आगामी सर्व निवडणुका एकत्रितपणे लढवाव्यात अशी आमची भूमिका असून, मोठा पक्ष असलेल्या काँग्रेसने याबाबत निर्णय घ्यायचा आहे, असे ते म्हणाले.
तटकरे म्हणाले, कठीण काळात मला राष्ट्रवादी काँग्रेस पक्षाची धुरा सांभाळायला मिळाली याचा अभिमान आहेच. शिवाय राष्ट्रवादीने विरोधक म्हणून भक्कम बाजू मांडली आणि त्या योगदानात माझा समावेश होता अशा शब्दात तटकरे यांनी आपल्या भावना व्यक्त केल्या. राष्ट्रवादीची स्थापना झाल्यापासून संविधानिक पध्दतीने प्रदेशाध्यक्षांची निवड केली गेली आहे. मी सलग चार वर्षे प्रदेशाध्यक्ष पदाची धुरा सांभाळली आहे. याच कालावधीत आम्ही सरकारविरोधात हल्लाबोल आंदोलन पुकारले होते. यामध्ये ९५ सभा घेत विरोधी पक्षाची भूमिका ठामपणे मांडण्याचा प्रयत्न केल्याचेही तटकरे यांनी सांगितले.