म. टा. वृत्तसेवा, नवी मुंबई
शिधावाटप दुकानदारांना पाच कि. ग्रॅम गॅस सिलिंडर दुकानात उपलब्ध करून देण्याची योजना शिधावाटप कार्यालयाने सुरू केली आहे. यासाठी कोणतीही अट नाही, मात्र शिधावाटप दुकानदारांच्या दुर्लक्षामुळे ही योजना पूर्णपणे राबवली जाऊ शकली नाही. त्यामुळे अधिकाधिक दुकानदारांनी गॅस सिलिंडर दुकानात उपलब्ध करावेत. यातून दुकानदारांना कमिशन मिळेल आणि नागरिकांना गॅसची टंचाईही जाणवणार नाही, असे आवाहन शिधा वाटप मुख्य अधिकारी एस. वंजारी आणि वाशी कार्यालयातील ब शिधावाटप आधिकारी बा. पा. मुलुक यांनी केले.
शिधावाटप दुकानातून, दुकानदारांना थोडेफार कमिशन मिळावे, तसेच नागरिकांना वेळोअवेळी गॅस उपलब्ध व्हावा, या उद्देशाने ही योजना सुरू केली आहे. ही योजना झोपडपट्टी विभागातील अनेक किराणा दुकानांत यापूर्वीच सुरू आहे. त्यासाठी कोणत्याही परवान्याची आवश्यकता नाही, फक्त सुरक्षेच्या दृष्टिकोनातून हे ५ कि. ग्रॅम गॅस सिलिंडर ठेवण्यासाठी २० सिलिंडर क्षमतेचा लोखंडी जाळीचा कुलुप बंद पिंजरा बनवून घेणे आवश्यक आहे. दुकानदारास प्रति सिलिंडर ४० रुपये कमिशन आहे. शिवाय नागरिकांना गॅस सुविधा ही उपलब्ध होऊ शकेल, मात्र अनेक दुकानदारांकडे पिंजरा बनवण्यासाठी जागाच नसल्याने ते गॅस सिलिंडर ठेवत नसल्याची परिस्थिती अनेक ठिकाणी आहे.