मुंबई : 'एखादी मुलगी पसंत असेल, पण ती लग्नाला नकार देत असेल तर मला सांगा. तिला पळवून आणण्यात मी मदत करेन', असे अविवेकी व अतिरेकी विधान करणाऱ्या भाजप आमदार राम कदम यांनी गुरुवारी ट्विटरवरून माफीनामा सादर केला. दरम्यान, कदम यांना राज्य महिला आयोगाने कारणे दाखवा नोटीस बजावली आहे. भाजपनेही कदम यांच्यावर कारवाईचे संकेत दिले असून, त्यांना प्रवक्तेपदावरून हटविण्यात येणार असल्याचे कळते.
राम कदम यांच्या आक्षेपार्ह वक्तव्याचे पडसाद राज्यभर उमटत असताना, त्यांनी गुरुवारी ट्विटरच्या माध्यमातून माफी मागितली. 'माझ्या वक्तव्याचा विपर्यास करून राजकीय हेतूने प्रसार करण्यात आला. तसेच माझी राजकीय प्रतिमा डागाळण्यात आली. तरी माझ्या वक्तव्यामुळे माता-बहिणींच्या भावना दुखावल्या असतील, तर मी माफी मागतो', असे राम कदम यांनी म्हटले आहे. कदम यांचा माफीनामा सादर होत असतानाच, राज्य महिला आयोगाने त्यांना कारणे दाखवा नोटीस बजावली. त्यांना सात दिवसांत स्पष्टीकरण करण्यास सांगण्यात आल्याने माफीनंतरही कदम अडचणीत आले आहेत.