उपमुख्यमंत्री अजित पवार यांची माहिती
म. टा. प्रतिनिधी, मुंबई
'महाराष्ट्रात बेकायदा ऑनलाइन लॉटरीमुळे राज्याच्या महसुलात होत असलेली घट रोखण्यासाठी तातडीने उपाययोजना करण्यात याव्यात. यासंदर्भात पश्चिम बंगाल सरकारने केलेल्या उपाययोजनांचा अभ्यास करण्यासाठी पोलिस व वित्त विभागाच्या अधिकाऱ्यांचे पथक पाठवून माहिती घेण्यात यावी,' असे निर्देश उपमुख्यमंत्री अजित पवार यांनी शनिवारी येथे दिले आहेत.
'आपल्या राज्याची ऑनलाइन लॉटरी नाही; परंतु बाहेरील राज्यांची ऑनलाइन लॉटरी सुरू आहे. त्यातून मिळणाऱ्या महसुलात गेल्या काही महिन्यात मोठी घट झाली आहे. राज्यात बेकायदा पद्धतीने सुरू असलेल्या ऑनलाइन लॉटरीमुळे राज्याच्या महसुलाचे मोठे नुकसान होत आहे. राज्याची पेपर लॉटरी, तसेच बाहेरील राज्यांच्या ऑनलाइन लॉटरीमुळे मिळणाऱ्या महसुलात घट होण्याचे मूळ हे बेकायदा लॉटरीत आहे. त्यामुळे बेकायदा लॉटरीवर निर्बंध आणण्याची गरज आहे. त्यासाठी वित्त विभाग, पोलिस व लॉटरी वितरकांनी संयुक्तपणे प्रयत्न करण्याची गरज आहे,' उपमुख्यमंत्री अजित पवार यांनी सांगितले.
त्यासाठी पश्चिम बंगालच्या पोलिसांनी केलेल्या उपाययोजनांची माहिती घेण्यात यावी व त्यानुसार पुढील निर्णय घेण्यात यावा, असे या बैठकीत ठरले. शिवाय लॉटरीच्या महसुलातून वाढलेली रक्कम पोलिस दलाच्या गृहनिर्माणासाठी वापरण्यात येईल असेही उपमुख्यमंत्री पवार यांनी स्पष्ट केले.