म. टा. वृत्तसेवा, नवी मुंबई
अज्ञात टोळीने रिलायन्स जिओ कंपनीच्या नावाने वेगवेगळे बनावट ई-मेल आयडी व वेबसाइट बनवून त्याद्वारे शेकडो ग्राहकांना जिओ टॉवरची उभारणी करून भाडे देण्याचे, रिलायन्स-जिओ कंपनीत नोकरी लावण्याचे, जिओ फायबरची इंटरनेट जोडणी देण्याचे तसेच जिओ केबीसी नावाने लॉटरी लागल्याचे आमिष दाखवून लाखो रुपये उकळल्याचे उघडकीस आले. या टोळीने आतापर्यंत ५० ग्राहकांकडून तब्बल ९ लाख ४४ हजार रुपये उकळल्याचे आढळून आले असले, तरी या टोळीने शेकडो ग्राहकांना कोट्यवधींचा गंडा घातल्याचा संशय व्यक्त करण्यात येत आहे. रबाळे एमआयडीसी पोलिसांनी या टोळीविरोधात फसवणुकीसह आयटी अॅक्टनुसार गुन्हा दाखल करून या टोळीचा शोध सुरू केला आहे.
अज्ञात टोळीने जानेवारी २०१८मध्ये रिलायन्स जिओ कंपनीचा बनावट ई-मेल आयडी व वेबसाइट बनवून त्या माध्यमातून त्यांनी ई-मेल, वेबसाइट व व्हॉट्सअॅपद्वारे लोकांना वेगवेगळी माहिती पाठवून दिली. त्यानंतर या टोळीने रिलायन्स जिओ इन्फोकॉम, जिओ मोबाइल या कंपन्यांतून बोलत असल्याचे सांगून जिओ कंपनीचा मोबाइल टॉवर जागेत किंवा घराच्या छतावर लावल्यास महिना २५ हजार रुपये भाडे व २५ लाख रुपये डिपॉझिट मिळेल, असे आमिष दाखवून त्यांच्याकडून ५०० रुपयांपासून ५० हजार रुपयांपर्यंत रोख रक्कम उकळली.