एक लाख झाडे लावण्याचा संकल्प

म. टा. वृत्तसेवा, पनवेल

शेकाप नेते माजी आमदार विवेक पाटील यांच्या वाढदिवसानिमित्त एक लाख झाडे लावण्याचा संकल्प प्रभाग क्रमांक २ मध्ये करण्यात आला. पालिका आयुक्त डॉ. सुधाकर शिंदे यांच्या प्रमुख उपस्थितीत रविवारी वृक्षलागवड करण्यात आली. नगरसेवक अरविंद म्हात्रे यांच्या संकल्पनेतून राबविण्यात आलेल्या कार्यक्रमाला आमदार बाळाराम पाटील, शेकाप नेते काशीनाथ पाटील उपस्थित होते.

१९ जून रोजी माजी आमदार विवेक पाटील यांचा वाढदिवस साजरा केला जातो. जिल्हापरिषदेचे कृषी सभापती म्हणून जिल्ह्यात यशस्वी वृक्षलागवड करणाऱ्या अरविंद म्हात्रे यांनी वृक्षलागवडीचा कार्यक्रम आयोजित केला होता. वाढदिवसाच्या निमित्त पनवेलमध्ये एक लाख झाडे लावण्याचा संकल्प म्हात्रे यांनी केला. प्रभाग क्रमांक दोनमधील नावडे गावातून वृक्षलागवडीचा कार्यक्रम घेण्यात आला. पालिका आयुक्त डॉ. सुधाकर शिंदे यांनी या उपक्रमाचे कौतुक करीत महापालिकेकडून अशा उपक्रमांना सर्वोतपरी सहकार्य केले जाईल, असे मत व्यक्त केले. एक लाखापैकी १० हजार झाडे जगली तरी ही आनंदाची बाब असेल, असे मत त्यांनी व्यक्त केले. झाडे लावण्यासाठी १० हजार खड्डे खणण्यात आल्याचे ते म्हणाले.