म. टा. खास प्रतिनिधी, नाशिक
सिटीबस ताब्यात घेण्याचा प्रस्ताव महासभेवर येण्यापूर्वीच प्रशासनाने सिटीबसचे नियोजन सुरू केले आहे. त्या अंतर्गत राज्य परिवहन महामंडळाकडून सध्या शहरात असलेल्या ३५० बस थांब्याची पुर्नरचना करण्याचे काम हाती घेतले आहे.
शहरात इलेक्ट्रॉनिक बसेस चालवणे ठेकेदाराला सक्तीचे केले जाणार असल्याने शहरात ५० ठिकाणी चार्जिंग स्टेशन उभारले जाणार आहे. शहरात २१० बसेसचे मार्ग निश्चित केले जाणार असून, कमी संख्या असलेले बसथांबे रद्द केले जाणार आहे. राज्य परिवहन महामंडळाने बससेवा चालविण्यात नकार दिल्यानंतर महापालिकेने बससेवा ताब्यात घेण्याची तयारी केली आहे. बससेवेचे खासगीकरण केले जाणार असून, पीपीपी तत्त्वावर ही बससेवा सुरू केली जाणार आहे. येत्या महासभेत सीटीबसचा प्रस्ताव सादर होण्याची शक्यता असली तरी, बससेवेच्या अंमलबजावणीचे काम अगोदरच सुरू केले आहे. जवळपास साडे तीनशे बसेस मक्तेदारामार्फत चालविल्या जातील. बससेवेच्या पायाभुत सुविधा मक्तेदारामार्फत तर तिकिटाचे दर ठरविणे व वसुली महापालिकेतर्फे केली जाणार आहे. बसेसची संख्या वाढल्याने बस थांब्यांची देखील संख्या वाढली जाणार आहे. शहराच्या सहा विभागात एकूण ३५० पेक्षा अधिक बस थांबे निर्माण करण्यात आले. काही थांबे फायद्यात तर काही थांबे तोट्यात होते. बससेवेच्या नव्या धोरणानुसार २१० मार्ग निश्चित केले जाणार असून, त्यात प्रवाशांची संख्या अगदी कमी असलेले थांबे रद्द करून त्याऐवजी नवीन थांब्यांची निर्मिती केली जाणार आहे.