रिक्षाचालकांचा मनस्ताप
बेशिस्तीविरोधात रेल्वेच्या ट्विटर अकाऊंटवर तक्रारीऐरोली रेल्वे स्थानकाच्या पूर्वेकडे अडवला जातो रस्ताकारवाईचा केवळ देखावाम टा...
बेशिस्तीविरोधात रेल्वेच्या ट्विटर अकाऊंटवर तक्रारी
ऐरोली रेल्वे स्थानकाच्या पूर्वेकडे अडवला जातो रस्ता
कारवाईचा केवळ देखावा
म. टा. वृत्तसेवा, नवी मुंबई
ऐरोली रेल्वे स्थानकाच्या पूर्व बाजूला प्रवासी भाडे घेण्यासाठी उभे राहणारे काही रिक्षाचालक रेल्वे स्थानकाच्या प्रवेशद्वारावर बेशिस्त रिक्षा लावून प्रवाशांची अडवणूक करत असल्याने या रेल्वे स्थानकातून कामानिमित्त नियमित ये-जा करणाऱ्या प्रवाशांना नाहक मनस्ताप सहन करावा लागत आहे. रस्ते अडविणे, प्रवाशांबरोबर हुज्जत घालणे, असे अरेरावीचे प्रकार या ठिकाणी नियमित घडत असल्याने या रिक्षाचालकांविरोधात नागरिकांकडून थेट रेल्वेच्या ट्विटर अकाऊंटवर तक्रारी करण्यात येत आहेत. या रिक्षाचालकांवर कारवाई केवळ देखावा केला जात असल्याने रिक्षाचालकांची मुजोरी दिवसेंदिवस वाढू लागली आहे.
ट्रान्स हार्बर रेल्वेमार्गावरील रेल्वे स्थानकांची उभारणी करताना, सिडकोने सर्वच रेल्वे स्थानकांच्या आवारात प्रवाशांच्या सुविधेसाठी पार्किंगसह रिक्षा व टॅक्सी स्टँडसाठी जागा दिली आहे. ऐरोली रेल्वे स्थानकाच्या पूर्व व पश्चिम या दोन्ही बाजूंकडे सिडकोच्या वतीने रिक्षा व टॅक्सी स्टँडसाठी जागा देण्यात आली. मात्र काही रिक्षा चालक तेथील रिक्षा स्टँडमध्ये आपली रिक्षा उभी न करता, थेट रेल्वे स्थानकाच्या प्रवेशद्वारावर बेशिस्त उभी करून प्रवाशांची अडवणूक करत असतात. त्यामुळे रेल्वे स्थानकातून बाहेर पडणाऱ्या व प्रवेश करणाऱ्या प्रवाशांना नेहमीच या रिक्षांच्या गर्दीतून वाट काढून जावे लागत आहे. रेल्वे स्थानकाच्या प्रवेशद्वारावर रिक्षा उभ्या करणाऱ्या चालकांच्या संख्येत वाढ झाली आहे. शेअर रिक्षाच्या नावाखाली हे मुजोर रिक्षाचालक सकाळ-संध्याकाळ तसेच रात्रीच्या वेळी रेल्वे स्थानकाच्या प्रवेशद्वारासमोरील जागेचा ताबा घेत असतात. तीन प्रवासी मिळाल्यानंतरदेखील हे रिक्षा चालक चौथ्या प्रवाशाची वाट पाहत जागा अडवून ठेवत असल्यामुळे सकाळी आणि सायंकाळी गर्दीच्या वेळी रेल्वे स्थानकातून बाहेर येणाऱ्या प्रवाशांना येथून चालणे शक्य होत नाही. काही प्रवाशांकडून या बेशिस्त रिक्षाचालकांना रिक्षा बाजूला घेण्यास सांगितल्यास उलट हे रिक्षाचालक त्यांनाच अरेरावी करत असल्याच्या घटनादेखील या ठिकाणी घडल्या आहेत.
रिक्षाचालकांच्या या मुजोरीमुळे त्रस्त असलेल्या काही प्रवाशांनी थेट रेल्वेच्या ट्विटर अकाऊंटवर तसेच आरपीएफकडे बेशिस्त रिक्षाचालकांची छायाचित्रे, व्हिडीओ टाकून तक्रारी केल्या. त्यानंतर आरपीएफचे जवान या रिक्षाचालकांना हुसकावून लावत असले तरी, ते त्या ठिकाणावरून गेल्यानंतर पुन्हा तीच परिस्थिती तयार होत असल्याचे प्रवाशांचे म्हणणे आहे. या बेशिस्त रिक्षाचालकांवर कारवाई करण्याची मागणी या भागात नियमित कामासाठी येणाऱ्या प्रवाशांकडून करण्यात येत आहे.
रिक्षाचालकांमध्ये चढाओढ
ऐरोली भागात मोठ्या प्रमाणात आयटी कंपन्यांसह इतर मल्टीनॅशनल कंपन्या तसेच कॉल सेंटर असल्याने या कंपन्यामध्ये कामानिमित्त दररोज मुंबई-ठाण्यातून हजारो तरुण-तरुणी येत असतात. या तरुण-तरुणींना घेण्यासाठी येथील रिक्षाचालकांमध्ये चढाओढ सुरू असते. त्यामुळे काही रिक्षा चालक रिक्षा थांब्याऐवजी रेल्वे स्थानकाच्या प्रवेशद्वारावर आपल्या रिक्षा बेशिस्त उभ्या करून सर्वच प्रवाशांना वेठीस धरत असल्याचे चित्र सध्या या ठिकाणी आहे.
कारवाईसाठी पत्रव्यवहार
ऐरोली रेल्वे स्थानकाच्या पूर्व बाजूला काही रिक्षाचालक हे रेल्वे स्थानकाच्या प्रवेशद्वारावर बेशिस्त रिक्षा लावून प्रवाशांची अडवणूक करत असल्याच्या तक्रारी आरपीएफकडे तसेच रेल्वेच्या ट्विटर अकाऊंटवर प्राप्त झाल्या. त्यानुसार येथील बेशिस्त रिक्षाचालकांवर कारवाई करण्यात यावी, यासाठी तुर्भे आरपीएफकडून नवी मुंबई आरटीओसह स्थानिक पोलिस ठाणे, तसेच सिडकोच्या अतिक्रमणविरोधी विभागाकडे लेखी पत्रव्यवहार करण्यात आले आहेत. तसेच त्यांना या रिक्षाचालकांवर कारवाई करण्यांदर्भात सूचित करण्यात आल्याची माहिती तुर्भे आरपीएफचे वरिष्ठ निरीक्षक पी. के. विश्वकर्मा यांनी दिली.