सत्ताधाऱ्यांनी केले आयुक्तांना लक्ष्य

म. टा. वृत्तसेवा, पनवेल

महासभेच्या इतिवृत्तात होणाऱ्या चुका, सफाई कर्मचाऱ्यांचा संप, सिडको हस्तांतरणाबाबत आयुक्तांची अस्पष्ट भूमिका, या सगळ्या प्रश्नांवर महापालिकेच्या महासभेत सत्ताधाऱ्यांनी आयुक्तांना लक्ष्य केले. सत्ताधारी पक्षाच्या नगरसेवकांनी महापालिकेपेक्षा ग्रामपंचायत बरी, असा शब्दांत प्रशासनाच्या कारभारावर टीका केली.

महासभेच्या सुरुवातीलाच झोपडपट्टी सुधार समितीचे सभापती प्रकाश बिनेदार यांनी प्रशासनावर हल्ला चढवला. आम्ही विचारलेल्या प्रश्नाचे उत्तर मिळत नाही, माहिती मिळत नाही, महापालिकेकडून अपेक्षाभंग झाल्याचे बिनेदार यांनी स्पष्ट केले. नगरसेवक नितीन पाटील यांनी प्रशासनाचा गलथान कारभार सुरू असल्याचे सांगितले. आयुक्तांचे दालन वेळेत पूर्ण होते. महापौरांना दालन मिळत नाही, आम्ही मागील चार महिन्यांत महापालिकेत आलो. मात्र तुम्ही येऊन वर्ष झाले. या कालावधीत तुम्ही काय केले, असा जाब त्यांनी विचारला. शहरातील रस्ते खड्डेमय झाले आहेत, महासभेचे रेकॉर्डिंग योग्य होत नाही, कॅमेऱ्याच्या दर्जाबरोबर नाही, रेकॉर्डिंग मागूनही मिळत नाही, अशा तक्रारींचा पाढा त्यांनी वाचून दाखवला. पटलावरील विषयांना सुरुवात होण्यापूर्वीच महासभेबाहेर पगार न झाल्यामुळे घंटागाडी कामगारांनी ठिय्या मांडला. याच दरम्यान महापालिकेविरोधात घोषणाबाजीमुळे फडके नाट्यगृह दणाणून गेले. घोषणाबाजी सभागृहापर्यंत ऐकू येत असल्यामुळे सत्ताधाऱ्यांनी कचराप्रश्नावर तोडगा काढण्याची मागणी केली. यावर आयुक्त डॉ. सुधाकर शिंदे यांनी कचरा उचलणाऱ्या समीक्षा कन्ट्रक्शनला अंतिम नोटीस देण्यात आल्याचे सांगितले. महापालिकेच्या कर्मचाऱ्यांनी कचरा उचलण्यास दहा वाजल्यापासून सुरुवात केली असून शहर स्वच्छ होईल, असे आश्वासन दिले.

सिडको हस्तांतरणावरून वाद

सिडको हस्तांतरणावरूनही यावेळी वाद झाला. सत्ताधाऱ्यांनी सिडकोकडून हस्तांतरण झाल्याशिवाय नागरिकांना चांगल्या सुविधा देऊ शकत नाही, अशी भूमिका घेतली, तर विरोधकांनी सिडकोकडून इतर अपूर्ण गोष्टींची पूर्तता झाल्याशिवाय हस्तांतरण नको, असे मत मांडले.