म. टा. वृत्तसेवा, पनवेल
पनवेलचे प्रथम वर्ग न्यायदंडाधिकारी न्यायाधीशांना सर्पदंश झाल्याची घटना पनवेलमध्ये मंगळवारी घडली. धामण जातीचा साप सर्पमित्र वकिलांनी पकडल्यानंतर हाताळताना हा प्रकार घडला आहे. चंदन काशिद असे या सर्पदंश झालेल्या न्यायाधीशांचे नाव आहे.
पनवेलमध्ये न्यायालयाची इमारत नव्याने बांधण्यात आली असली तरी नव्या इमारतीत दिवाणी न्यायालय भरते. त्यामुळे प्रथम वर्ग न्यायालय आजही जुन्या इमारतीतच सुरू आहे. बंदररोडवर असलेली ही इमारत इंग्रजकालीन असून आजुबाजूला दाट झाडाझुडपांचा परिसर आहे. तसेच, हाकेच्या अंतरावर पनवेलचा खाडीपरिसर आहे. प्रथम वर्ग न्यायदंडाधिकारी चंदन काशिद नेहमीप्रमाणे सकाळी साडेअकरा वाजण्याच्या सुमारास न्यायालयात आले. तेव्हा न्यायालयात साप आल्याचे समजले. न्यायदानाचे काम सुरू असताना तातडीने कर्मचाऱ्यांना सांगून सापाला बाहेर काढण्याचे प्रयत्न सुरू केले. सर्पमित्र असलेले वकील अमित चव्हाण यांनी तातडीने न्यायालयात धाव घेऊन सापावर नियंत्रण मिळविले. हा साप धामण जातीचा असल्याचे सर्पमित्रांच्या लक्षात आले. पकडलेला साप न्यायाधीश चंदन काशिद दुसरे सर्पमित्र दीपक ठाकूर यांच्या हातात देत होते, तेव्हाच सापाने काशिद यांच्या हाताच्या बोटाला अचानक दंश केला. सापावर ताबा मिळवूनही सापाशी खेळल्यामुळे हा दंश झाल्याचे सांगण्यात येत आहे. साप चावल्यानंतर तातडीने न्यायाधीश काशिद यांनी पनवेलच्या ग्रामीण रुग्णालयात प्राथमिक उपचार घेतले. साप बिनविषारी असल्यामुळे त्यांना त्याचा अधिक त्रास झाला नाही. पुढील उपचार त्यांनी खासगी रुग्णालयात घेणार असल्याचे सांगितल्याची माहिती आरोग्य अधिकारी डॉ. नागनाथ यमपल्ले यांनी सांगितले. सर्पमित्रांनी सापाला तेथील परिसरात सोडून दिले. यापूर्वी न्यायालयाच्या परिसरात चार वेळा साप आल्याची माहिती सर्पमित्रांनी दिली.