पालिका सचिवांचा राजीनामा

म. टा. वृत्तसेवा, पनवेल

पनवेल महापालिकेचा कारभार सध्या नगरपालिकेच्या अपुऱ्या मनुष्यबळावर सुरू आहे. अतिरिक्त कामामुळे अधिकाऱ्यांवर कामाचा भार मोठ्या प्रमाणावर वाढला आहे. त्यामुळे वैयक्तिक कारण देऊन महापालिकेचे नगरसचिव गणेश साळवी यांनी पदाचा राजीनामा दिला आहे. हा राजीनामा कामाच्या वाढत्या ताणामुळेच दिल्याची चर्चा आहे.

नगरपालिका आणि २३ ग्रामपंचायती बरखास्त करून महापालिकेची स्थापना झाली. परंतु या पनवेल महापालिकेचा कारभार अजून नगरपालिकेच्या मनुष्यबळावरच सुरू आहे. महापालिकेच्या अनेक अधिकाऱ्यांना पाच ते सात विभागांची कामे वाटून दिली आहेत. त्यामुळे सध्या एक ना धड भाराभर चिंध्या अशी अवस्था पनवेल महानगरपालिकेची झाली आहे. महापालिका झाली म्हणून आनंद व्यक्त करणारे अधिकारी कामाचा भार वाढल्यानंतर मात्र नगरपालिकाच बरी होती, असे म्हणू लागले आहेत. सहाय्यक आयुक्तांसह नगरसचिवांना तीन ते नऊ विभागांच्या जबाबदाऱ्या वाटून दिल्या आहेत. महानगरपालिकेचा आकृतीबंद तयार करण्यात आला आहे. मात्र नवी भरती लालफितीत आहे.

पूर्वीचे प्रशासन अधिकारी गणेश साळवी यांना महापालिका निवडणुकीनंतर नगरसचिवपदाची जबाबदारी देण्यात आली. अतिरिक्त कार्यभार म्हणून त्यांच्याकडे ही जबाबदारी त्यांच्या इच्छेनुसार देण्यात आल्याचे सूत्रांकडून सांगण्यात आले. मात्र हे नगरसचिवपद त्यांना डोईजड झाले आहे. कारण सचिव पदाव्यतिरिक्त त्यांच्याकडे अन्य सहा वेगवेगळ्या जबाबदाऱ्या आहेत. मात्र यासाठी फक्त तीन कर्मचारी दिले आहेत. महापालिकेत मनुष्यबळाचा अभाव असल्यामुळे यापूर्वी त्यांनी कारभार कसाबसा चालविला, मात्र लोकप्रतिनिधींच्या हाती सूत्रे गेल्यानंतर कामाच्या अपेक्षा वाढल्यामुळे जबाबदारी वाढू लागली आहे. अपेक्षित वेळेत काम होत नसल्यामुळे अनेक अधिकारी-कर्मचारी कंटाळले आहेत.

या कामांना कंटाळून नगरसचिव गणेश साळवी यांनी १४ ऑगस्ट रोजी अतिरिक्तपदाचा राजीनामा आयुक्त डॉ. सुधाकर शिंदे यांच्याकडे सोपवला. राजीनाम्यात त्यांनी कारण स्पष्ट केले नसले तरी राजीनाम्यामागे कामाचा ताण हे कारण लपून राहिलेले नाही.