शिरवणेच्या भुयारी मार्गाची दुरवस्था

नवी मुंबई : शिरवणे येथील गणेश मंदिराशेजाराजवळील भुयारी मार्गाची दुरवस्था झाली आहे. या भुयारी मार्गातून वाहनांची आणि नागरिकांची सततची वर्दळ असूनही महापालिका त्याकडे दुर्लक्ष करत असल्याने वाहनचालक तसेच येथील नागरिकांना त्रास सहन करावा लागत आहे.

नेरुळमधील नागरिकांना पूर्वेकडून पश्चिमेकडे ये-जा करण्यासाठी राजीव गांधी उड्डाणपूल बांधला. त्याचवेळी शिरवणे येथे भुयारी मार्ग बनविण्यात आला. भुयारी मार्ग खोलगट भागात असल्यामुळे त्याच्या दोन्ही टोकांना पावसाळी पाण्याचा निचरा होण्यासाठी गटारे बांधली असून त्या गटारांवर लोखंडी जाळ्या बसवल्या आहेत. परंतु ही गटारे वेळोवेळी साफ केली जात नसल्याने जाळ्यांमधून पाण्याचा निचरा होत नाही. भुयारी मार्गाशेजारच्या झोपडपट्टीतील सांडपाणी या गटारात येत असल्याने आणि गटार साफ केले जात नसल्याने ते तुंबत असल्यामुळे या परिसरामध्ये दुर्गंधी पसरत आहे.

या भुयारी मार्गात काँक्रीटचा रस्ता असून त्याची दुरुस्ती होत नसल्यामुळे खड्डे पडले आहेत. यामुळे वाहने आदळून अपघात होतात. या भुयारी मार्गातून शिरवणे, नेरुळ आणि जुईनगरमधील शेकडो नागरिक ये-जा करत असतात. येथून सायन-पनवेल हायवेवर जाता येत असल्याने वाहनांची सततची वर्दळ असते. असे असूनही या भुयारी मार्गाच्या देखभाल व दुरुस्तीकडे महापालिका दुर्लक्ष करत असल्यामुळे स्थानिकांनी नाराजी व्यक्त केली आहे.

यावेळी शिरवणे येथील भुयारी मार्गाची संबंधित अधिकाऱ्यांमार्फत पाहणी करून येथे नागरिक व वाहनचालकांना भेडसावणाऱ्या समस्या दूर करण्यात येणार असल्याचे महापालिकेचे अतिरिक्त आयुक्त अंकुश चव्हाण यांनी सांगितले.