पती, सासूच्या जाचामुळे विवाहितेची आत्महत्या

नवी मुंबई : कामोठे भागात राहाणाऱ्या प्रियांका गायकवाड (२७) या विवाहितेने पती व सासुच्या छळाला कंटाळून राहत्या घरात गळफास घेऊन आत्महत्या केल्याची घटना उघडकीस आली आहे. प्रियांकाच्या पतीने या घरासाठी बँकेकडून २६ लाखांचे कर्ज घेतले होते. हे कर्ज फेडण्यासाठी प्रियांकाने माहेरून पैसे आणावेत यासाठी पती भास्कर गायकवाड व सासू रुक्मिणी गायकवाड हे दोघेही तिचा छळ करत होते. प्रियांकाच्या आईने केलेल्या या तक्रारीनुसार पोलिसांनी प्रियांकाच्या पती व सासूविरोधात छळवणुकीसह आत्महत्येस प्रवृत्त केल्याप्रकरणी गुन्हा दाखल करून तपास सुरू केला आहे.

प्रियांका व भास्करचा नोव्हेंबर २०१७मध्ये विवाह झाला होता. कामोठे सेक्टर-९ मधील फ्युचर दर्पण सोसायटीत ते राहत होते. लग्नानंतर ती नोकरीला जात होती. तिचा पगार तिची सासू घेत असे. प्रियांकाने दोन महिन्यांचा पगार आपल्या खर्चासाठी बँकेत ठेवल्याने पतीने व सासूने तिला शिवीगाळ करून मारहाण केली होती. याबाबतची माहिती तिने आपल्या आईला फोनवरून दिली होती. त्यानंतर प्रियांका गरोदर राहिल्याने तिने नोकरी सोडली.

घराचे कर्ज फेडण्यासाठी तिने माहेरहून पैसे आणावेत असा तगादा तिच्या नवऱ्याने लावला होता. मात्र माहेरची आर्थिक स्थिती बेताची असल्याने प्रियांकाने माहेरून पैसे आणण्यास नकार दिला होता. डिसेंबर २०१८मध्ये प्रसूतीसाठी माहेरी जातानादेखील तिच्या पतीने व सासूने पैशाची मागणी केली. आईवडिलांकडे पैसे नसतील तर शेतीवर कर्ज काढून पैसे घेऊन ये, अन्यथा घरी येऊ नकोस अशी दमदाटी केली होती. ती माहेरी असताना तिचा पती वारंवार फोन करून पैशांबाबत विचारणा करत असे.

एप्रिलमध्ये प्रियांकाला मुलगी झाल्यानंतर ती कामोठे येथे आपल्या सासरी आली. मात्र त्यानंतरही पती व सासूकडून तिचा छळ होत राहिला. मागील दोन महिन्यांत यात कमालीची वाढ झाली. याबाबत तिने आपल्या आईला सांगितले होते. तसेच आत्महत्येचा विचारही बोलून दाखवला होता. अखेर छळ असह्य झाल्याने ६ फेब्रुवारीला तिने हे टोकाचे पाऊल उचलले. प्रियांकाची आई लतिका जगदाळे यांनी या प्रकरणी कामोठे पोलिस ठाण्यात तक्रार दाखल केली.