नगरसेविकांचा अभ्यासदौरा उटी, बंगळुरूला

म. टा. वृत्तसेवा, नवी मुंबई

नवी मुंबई महानगरपालिकेच्या समाज विकास विभागाच्या वतीने महिला व बाल कल्याण समितीमार्फत सर्व महिला नगरसेवकांच्या अभ्यास दौऱ्याचे आयोजन करण्यात आले आहे. उटी, बंगळुरू या ठिकाणी हा दौरा आयोजित करण्यात आला आहे. यासाठी पालिका २५ लाख रुपये खर्च करणार आहे. मात्र या दौऱ्याविषयी अत्यंत गुप्तता पाळली जात आहे. त्यामुळे अभ्यास दौऱ्याच्या नावाखाली सहलीचे आयोजन तर केले जात नाही ना, अशी चर्चा पालिका वर्तुळात सुरू आहे.

नवी मुंबई महानगरपालिकेच्या नगरसेविका आणि नगरसेवकांचे दौरे नेहमीच सर्वांसाठी चर्चेचे विषय ठरतात. त्यामुळे या दौऱ्याची माहिती बाहेर जाणार नाही, याची पुरेपूर काळजी घेतली जाते. खरे तर अभ्यास दौरे आयोजित केल्यावर तिथे कोणत्या विषयावर अभ्यास केला जाणार आहे, त्याचा अहवाल सादर करणे अपेक्षित आहे. शिवाय केलेल्या अभ्यासाचा येथील नागरिकांना काय फायदा होणार आहे, तिथे कोणते उपक्रम राबविले जाणार आहेत का, याचा अहवाल मिळणे आवशक आहे. नगरसेवकांचे दौरे जनतेच्या पैशांतून काढले जात असल्याने ती माहिती जनतेपर्यंत पोहोचणे गरजेचे आहे. मात्र अशा अभ्यास दौऱ्यांचे अहवाल कधीच समोर येत नाहीत. त्यामुळे अभ्यास दौऱ्याच्या नावाखाली केवळ महागड्या सहली काढल्या जातात, असा आरोप नेहमीच होतो. मात्र अशा दौऱ्यांमध्ये सत्ताधारी-विरोधक दोन्ही सहभागी होत असल्याने त्यावर प्रत्यक्षात कुणीच काही बोलत नाही.

पालिकेच्या वतीने शहरात चार ठिकाणी माता बाल रुग्णालये आहेत. त्यातील तुर्भेमधील रुग्णालय दोन वर्षांपासून बंद आहे. इतर नेरूळ-ऐरोली भागातील माता बाल रुग्णालयातही महिला व बाल कल्याण समितीचा दौरा झालेला नाही. येथील माता बालकांच्या काय समस्या आहेत, त्यांना सर्व सोयीसुविधा मिळतात का, याची माहितीही या समितीच्या सदस्यांना आहे की नाही, हा चर्चेचा विषय आहे. असे असताना आता पालिकेच्या महिला व बाल कल्याण समितीमार्फत थेट उटी आणि बंगळुरू येथे अभ्यास दौरा का आयोजित केला आहे, असा प्रश्न उपस्थित झाला आहे.

या दौऱ्याचे आयोजन करण्यासाठी समाज विकास विभागाच्या वतीने निविदाही मागविण्यात आल्या आहेत. अंदाजे ६५ व्यक्तींसाठी हा दौरा आयोजित करण्यात येणार आहे, असे स्पष्ट करण्यात आले आहे. याबाबत महिला व बाल कल्याण समितीच्या सभापती सुजाता पाटील यांना विचारले असता, त्यांच्या पतीने याबाबत आपल्याला काही माहिती नसल्याचे सांगितले.