वृत्तसेवा, नवी मुंबई
खारघरमधील कोपरा गावच्या मागील बाजूस खाडीपात्रात एका अज्ञात व्यक्तीचा कुजलेल्या अवस्थेतील मृतदेह आढळून आला आहे. १३ ऑगस्टला दुपारी ३ वाजण्याच्या सुमारास हा मृतदेह आढळला. सदर मृत व्यक्ती हा पावसाच्या पाण्यामधून वाहून याठिकाणी आला असावा, अशी शक्यता पोलिसांकडून व्यक्त करण्यात येत आहे.
खारघर पोलिसांनी याप्रकरणी आकस्मिक मृत्यूची नोंद करून मृत व्यक्तीची ओळख पटविण्यासाठी प्रयत्न सुरू केले आहेत. या मृत व्यक्तीचे अंदाजे वय ४५ ते ५० वर्षे असून त्याची उंची पाच फूट पाच इंच आहे. या व्यक्तीचा मजबूत बांधा असून चेहरा गोल, नाक सरळ आहे. तसेच रंग गोरा असून त्याच्या अंगावर राखाडी रंगाचा हाफ टी-शर्ट आहे. टी-शर्टच्या पाठीमागील बाजूस एसजी५२ असे छापलेले आहे. या वर्णनाच्या व्यक्तीला कुणी ओळखत असल्यास त्यांनी खारघर पोलिस ठाण्यात संपर्क साधावा, असे आवाहन करण्यात आले आहे.