वाळूजमहानगर
मोहटादेवी चौकातील नीलम ज्वेलर्सचे शटर उचकटून चोरट्यांनी लाखोंचा ऐवज लंपास केल्याची घटना सोमवारी सकाळी उघडकीस आली. विशेष म्हणजे यातील चार चोरटे सीसीटीव्हीत कैद झाले आहेत.
नीलम सोन्नुरे पाटील (रा. शहागंज, औरंगाबाद) यांचे मोहटादेवी चौकात नीलम ज्वेलर्स नावाचे सोन्या-चांदीचे दुकान आहे़ शनिवारी रात्री दहाच्या सुमारास त्यांनी दुकान बंद केले. रविवारी दुकान बंद होते़ चोरीची माहिती मिळाल्यावर सोन्नुरे दुकानात आल्या. त्यावेळी दुकानाचे शटर तसेच चॅनेल गेटच्या लोखंडी पट्टया उचकटलेल्या दिसल्या. दुकानातील दागिन्यांचे बॉक्स व साहित्य विखुरलेले होते़ चोरट्यांनी दुकानातील चार किलो चांदी व पाच तोळे सोन्याचे मणी, एलईडी लंपास केले आहे़ या चोरीत जवळपास तीन लाखांच्या दागिन्यांची चोरी झाल्याचे नीलम सोन्नुरे यांनी सांगितले. चोरीची माहिती मिळताच वाळूज एमआयडीसी पोलिसांनी घटनास्थळी भेट देऊन पाहणी केली. चोरांचा शोध घेण्यासाठी श्वान पथकाला पाचारण करण्यात आले होते. श्वानाने मुख्य रस्त्यापर्यंत माग काढला. या प्रकरणी वाळूज एमआयडीसी पोलिस ठाण्यात उशिरापर्यंत गुन्हा दाखल करण्याची प्रकिया सुरू होती. दरम्यान, नीलम ज्वेलर्सच्या शेजारी असलेल्या एका मिठाईच्या दुकानातील सीसीटीव्हीत मध्यरात्री दीडच्या सुमारास चार संशयित चोरटे चोरी करताना कैद झाले आहेत. यातील एकाच्या हातात लोखंडी रॉड असल्याचे दिसत आहे. तो रॉड चोरी झाल्यानंतर घटनास्थळी सोडून चोरटे पसार झाले आहेत. आठ महिन्यांपूर्वी प्रताप चौकातील महावीर ज्वलेर्स या दुकानात चोरट्यांनी चोरी करून सोन्या-चांदीचे दागिने लांबविले होते.
\Bदुचाकी गायब झाल्याने हॉस्पिटलची तोडफोड
\Bपंढरपुरातील नेहा हॉस्पिटलमध्ये नातेवाईकाला भेटण्यासाठी आलेल्या दोन तरुणांची दुचाकी गायब झाल्यामुळे त्यांनी कर्मचाऱ्यांसोबत वाद घालत तोडफोड केल्याची घटना सोमवारी सकाळी नऊच्या सुमारास घडली. यात एकाला पकडून पोलिसांच्या ताब्यात दिले आहे़ रामा मिसाळ व त्याचा मित्र अमोल धीवर (रा़ वाळूज) हे दोघे नातेवाइकाला भेटण्यासाठी नेहा हॉस्पिटलमध्ये आले होते. त्यांनी हॉस्पिटलसमोर दुचाकी उभी केली होती. बाहेर आल्यावर त्यांना दुचाकी दिसली नाही़ त्यामुळे त्यांनी डॉक्टर व कर्मचाऱ्यांशी वाद घालण्यास सुरुवात केली. आमची दुचाकी चोरी झाली असून, याला तुम्ही जबाबदार आहात असा आरोप करत तोडफोड केली. यात एलईडी टीव्ही, मिनी ऑपरेशन थिएटरमधील साहित्यांची तोडफोड केली. तोडफोडीचे संतोष गांगुर्डे व मनोज पोफळे यांनी मोबाइलवर चित्रिकरण सुरू केले़ यावेळी त्यांनी कर्मचारी व डॉक्टरांना शिविगाळ करून संतोष गांगुर्डे यांचा २३ हजारांचा मोबाइल हिसकावून रामा मिसाळने पळ काढला. मात्र, त्याचा साथीदार अमोल धिवरला पकडून वाळूज एमआयडीसी पोलिसांच्या स्वाधीन करण्यात आले. तोडफोडीच्या घटनेत जवळपास ८० ते ९० हजारांचे नुकसान झाल्याचे डॉ. जी. एस. कुलकर्णी यांनी सांगितले आहे. त्यांची दुचाकी एकाने नजरचुकीने आपली दुचाकी नेली होती. त्याने ती परत आणून उभी केली.