कारचा काच फोडून दीड लाख पळवले
वसमतच्या बसस्थानकासमोरील घटना
हिंगोली- बँकेतून पैसे उचलून चहा पिण्यासाठी थांबलेल्या मुख्याध्यापकाच्या कारची काच फोडून अज्ञात चोरट्यांनी दीड लाख रुपये पळवले. ही घटना सोमवारी (१२ ऑक्टोबर) सकाळी साडेअकराच्या सुमारास घडली.
पोलिस सूत्रांकडून मिळालेली अधिक माहिती अशी की, सोमवारी सकाळी राजर्षी शाहू महाराज निवासी अपंग विद्यालयाचे मुख्याध्यापक खंडू विठ्ठलराव हाळदे (वय ५१) व त्यांचा मुलगा असे दोघेही संस्थेचे परीक्षण अनुदानाचे एकूण तीन लाख ८७ हजार ९७४ रुपये बँकेतून उचलून अल्टो कार (क्रमांक एम. एच. २६/ ३१८०) ने सकाळी नव्या बस स्टँड येथे येऊन थांबले. चहा पिण्यासाठी श्रीनाथ हॉटेलसमोर कार लावून हॉटेलमध्ये चहा पीत असताना दरम्यान कोणीतरी अज्ञात चोरट्याने कारच्या चालकाच्या बाजूची काच फोडून बॅगमध्ये ठेवलेले एक लाख ५० हजार रुपये चोरून नेले. या प्रकरणी खंडू हाळदे यांनी दिलेल्या फिर्यादीवरून अज्ञात चोरट्याविरुद्ध गुन्हा दाखल करण्यात आला. या प्रकरणाचा पुढील तपास आणि पोलिस निरीक्षक रवींद्रसिंग धुन्ने यांच्या मार्गदर्शनाखाली सहाय्यक पोलिस निरीक्षक सय्यद आजम हे करीत आहेत.