म. टा. वृत्तसेवा, नवी मुंबई
सहाय्यक पोलिस निरीक्षक अश्विनी बिद्रे हत्या प्रकरणात शनिवारी नवी मुंबई पोलिसांनी पनवले न्यायालयात सुमारे पाचशे पानांचे आरोपपत्र दाखल केले. या गुह्याच्या तपासाअंती नवी मुंबई गुन्हे शाखेने गोळा केलेले पुरावे, आरोपींचे मोबाइल लोकेशन, साक्षी पुरावे व इतर तांत्रिक पुराव्यांच्या आधारावर हे आरोपपत्र दाखल करण्यात आले.
बिद्रे यांच्या बेपत्ता होण्यामागे ठाणे ग्रामीण पोलिस आयुक्तालयातील वरिष्ठ पोलिस निरीक्षक अभय कुरुंदकर याचा हात असल्याच्या संशयावरून नवी मुंबई पोलिसांनी त्याला ७ डिसेंबर २०१७ रोजी अटक केली होती. त्यानंतर पोलिसांनी या प्रकरणात अभय कुरुंदकरला मदत केल्याच्या संशयावरून माजी महसूल मंत्री एकनाथ खडसे यांचा भाचा राजेश पाटील याला १० डिसेंबर २०१७ रोजी अटक केली. मात्र पोलिसांना या दोघांकडून कुठल्याच प्रकारची ठोस माहिती मिळवता आली नाही.
त्यानंतर पोलिसांनी या प्रकरणाचा अधिक तपास करत कुरुंदकरचा चालक कुंदन भंडारी याला अटक केली. त्याच्याकडून मिळालेल्या माहितीवरून कुरुंदकरचा बालपणीचा मित्र महेश फळणीकर याला पुण्यातून अटक करण्यात आली. फळणीकरच्या चौकशीत बिद्रे यांची हत्या अभय कुरुंदकरनेच केल्याचे तसेच अश्विनी बिद्रे यांच्या मृतदेहाचे तुकडे पेटीत भरून भाईंदरच्या खाडीमध्ये टाकल्याची कबुली दिली.
त्यानंतर नवी मुंबई पोलिसांनी या प्रकरणात अभय कुरुंदकर याच्यासह त्याला या हत्याप्रकरणात मदत करणाऱ्या राजेश पाटील, कुंदन भंडारी व महेश फळणीकर या सगळ्यांवर हत्या, अपहरण व पुरावे नष्ट करणे आदी कलमान्वये गुन्हे दाखल केले आहेत. सध्या हे चौघेही विविध कारागृहात कैदेत आहेत.