वर्धा मार्गावरील घटना; विवेकानंद रुग्णालयाच्या डॉक्टरांनी वाचविला जीव
म.टा.प्रतिनिधी, नागपूर
नागपूरहून वर्ध्याला जाणाऱ्या एसटीत तो बसला तेव्हा पुढे काय घडणार आहे, याची त्याला कल्पनाही नव्हती. बस वर्धा मार्गावर पोहोचली आणि बाजूने जाणाऱ्या स्टार बसचा धक्का एसटीला बसला. काही कळायच्या आत अनपेक्षित घडले आणि एसटीच्या खिडकीचा लोखंडी रॉड त्याच्या छातीत घुसला, नव्हे आरपार जाऊन सीटमध्ये रुतून बसला. एरवी एखाद्याचा जीवच जायचा, पण त्याचे नशीब बलवत्तर म्हणा, किंवा त्याची जगण्याची इच्छाशक्ती म्हणा...श्वासांत खंड पडला नाही. मग सुरू झाला संघर्ष, आश्चर्याने डोळे विस्फारणारा आणि मृत्यूच्या दाढेतून रुग्णाला खेचून आणण्याचा!
कुणाचाही विश्वास बसणार नाही, अशी ही घटना बुधवारी वर्धा मार्गावर घडली. छत्तीसगड येथील संजय पुराणिक हे नागपूरहून वर्ध्याला जाणाऱ्या एसटी बसमध्ये बसले. गाडी चिंचभुवनच्या जवळपास पोहोचत असताना तिला स्टार बसचा धक्का बसला आणि खिडकीशी बसलेल्या पुराणिक यांच्या छातीत खिडकीचा रॉड घुसला. छातीच्या डाव्या बाजूने आत गेलेला हा लोखंडी रॉड आरपार जाऊन सीटमध्ये जाऊन फसला. त्यामुळे ते सीटला चिकटून बसले आणि त्यांना हालचाल करणेही अशक्य झाले होते. इतका भयंकर अपघात होऊनही पुराणिकांच्या जीवाला सुदैवाने काहीही अपाय झाला नाही. सुरुवातीच्या धक्क्यातून सावरल्यानंतर बसचालक आणि सहप्रवाशांनी बस थेट खापरी येथील स्वामी विवेकानंद मेडिकल मिशनच्या रुग्णालयात नेली.
तेथे पोहोचल्याबरोबर रुग्णालयाचे कर्मचारी गिरीश आणि भाऊराव यांनी हॉ रॉड तोडून पुराणिक यांना मोकळे केले. त्यानंतर, छातीत रॉड असलेल्या परिस्थितीतच त्यांना ऑपरेशन थिएटरमध्ये दाखल करण्यात आले. डॉ. अविनाश रोडे आणि विवेकानंद हॉस्पिटलच्या इतर डॉक्टर- कर्मचाऱ्यांनी तातडीने पुराणिक यांच्यावर उपचार सुरू केले. त्यांच्यावर शस्त्रक्रिया करून हा रॉड छातीतून बाहेर काढला. तब्बल दोन ते तीन तास सुरू असलेल्या या विचित्र संघर्षाला अखेर यश आले. इतका जीवघेणा अपघात होऊनही पुराणिकांच्या बलवत्तर दैवामुळे आणि हॉस्पिटलच्या प्रयत्नामुळे त्यांचा जीव वाचिवण्यात यश आले. संजय पुराणिक यांना आता विवेकानंद हॉस्पिटल येथे अतिदक्षता कक्षात ठेवण्यात आले असून, त्यांची प्रकृती स्थिर आहे.
हॉस्पिटलचे डॉ. जितेश चव्हाण, डॉ. गौतम तसेच इतर कर्मचाऱ्यांनी या उपचारांदरम्यान प्रयत्नांची शर्थ केली. रुग्णालयातील सहकाऱ्यांच्या एकत्रित प्रयत्नांमुळे पुराणिक यांचा जीव वाचविणे शक्य झाले, अशी माहिती पुराणिक यांच्यावर शस्त्रक्रिया करणारे डॉ. अविनाश रोडे यांनी दिली.