म. टा. वृत्तसेवा, नांदेड
प्रेम प्रकरणातून जन्माला आलेल्या दोन वर्षीय चिमुकल्याला रागाच्या भरात विवाहितेने कंटेनरखाली फेकून दिल्याने त्याचा चिरडून मृत्यू झाल्याची हृदयद्रावक घटना शनिवारी घडली.
हिंगोली जिल्ह्यातील डोंगरकडा येथे राहणाऱ्या एका विवाहितेला विवाहबाह्य संबंधातून २०१८ मध्ये दुसरा मुलगा झाला. या प्रेम प्रकरणाची माहिती तिच्या पतीलाही होती. १८ मे रोजी प्रियकराने या विवाहितेच्या पतीला फोन करून विवाहिता आणि मुलाला बोंढार या त्याच्या गावी सोडण्यास सांगितले. त्यानुसार सर्व जण बोंढारला गेले. २२ मे रोजी विवाहितेचा पती डोंगरकड्याला परतण्यासाठी निघाला असता प्रियकराने महिलेला व मुलाला सांभाळण्यास नकार दिला. त्यामुळे विवाहिता, मुलगा व पती हे गावाकडे जाण्यासाठी पायी निघाले. बोंढार बायपासवर येताच विवाहितेला राग अनावर झाला आणि तिने समोरुन आलेल्या कंटेनरखाली दोन वर्षीय चिमुकल्याला फेकून दिले.