मालकाने हत्या केल्याची भावाची तक्रार
म. टा. वृत्तसेवा, नवी मुंबई
सानपाडा सेक्टर ५मधील दूधडेअरीत काम करणाऱ्या सचिनसिंह धिरेश सिंह या १७ वर्षीय मुलाने इमारतीच्या चौथ्या मजल्यावरून उडी मारून आत्महत्या केल्याची घटना घडली. मात्र सचिनसिंह याने आत्महत्या केली नसून त्याची डेअरी मालकाने व त्याच्या भावाने हत्या केल्याचा आरोप सचिनसिंह याचा मोठा भाऊ सौरभ सिंह याने केला आहे. त्याबाबतची तक्रार त्याने सानपाडा पोलिसांकडे केली आहे. पोलिसांनी अधिक चौकशी सुरू केली आहे.
सचिनसिंह हा तरुण मूळचा उत्तरप्रदेश राज्यातील असून सात महिन्यांपूर्वीच तो शेजारच्या गावातील विजयशंकर यादव यांच्या ओळखीतून मुंबईत कामानिमित्त आला होता. विजयशंकर याने सचिनला सानपाडा सेक्टर ५मधील दूधडेअरीत कामाला लावले होते. सचिन दिवसभर काम करून डेअरीमध्येच रहात होता. त्याला जेवण्यासाठी मालक विजयशंकर यांच्या घरून जेवणाचा डबा देण्यात येत होता. रविवारी रात्री सव्वा अकरा वाजण्याच्या सुमारास विजयशंकर यांच्या घरातून जेवणाचा डबा आणण्यासाठी तो गेला होता. मात्र तो त्यांच्या घरी न जाता, त्याने त्याच इमारतीच्या चौथ्या मजल्यावरील गच्चीवर जाऊन तेथून उडी मारली. जखमी सचिनला बेलापूर येथील अपोलो रुग्णालयात दाखल करण्यात आले होते. मात्र उपचारादरम्यान त्याचा मृत्यू झाला. या घटनेनंतर सचिनचा मोठा भाऊ सौरभने सचिनच्या आत्महत्येबाबत संशय व्यक्त करून त्याची हत्या झाल्याची तक्रार सानपाडा पोलिसांकडे केली. सचिनने मालकाच्या मुलीचे दुसऱ्या मुलासोबतचे व्हिडीओ काढल्याने त्याला मालक विजयशंकर व त्याचा भाऊ व इतरांनी त्याची संगनमताने हत्या केल्याचे सौरभने पोलिसांना दिलेल्या जबाबात म्हटले आहे. तसेच, घटनेच्या तीन-चार दिवसांपूर्वी सचिनने सौरभला फोन करून डेअरीचा दैनंदिन हिशोब मालकाला व्यवस्थित देत असतानाही विजयशंकर हा पुन्हा-पुन्हा आपल्याकडे हिशोब मागत असल्याचे सांगितले होते. त्यावर सौरभने तो जास्त त्रास देत असल्यास तेथील काम सोडून देण्यास सांगितले होते.