नवी मुंबई : नेरुळ सेक्टर २७ मधील मेरिडियन मिस्टक या इमारतीत घरफोडी भरदिवसा करून सुमारे पावणेआठ लाख रुपये किमतीचा ऐवज चोरून नेल्याची घटना उघडकीस आली आहे. नेरुळ पोलिसांनी या प्रकरणी घरफोडीचा गुन्हा दाखल करून तपास सुरू केला आहे. आनंद पारकल (४६) हे मेरिडियन मिस्टक इमारतीत ८०२ क्रमांकाच्या फ्लॅटमध्ये रहातात. गुरुवारी सकाळी साडेसात वाजता आनंद पारकल हे नेहमीप्रमाणे कामावर निघून गेले होते. यादरम्यान त्यांचे घर बंद असल्याने चोरांनी संधी साधून त्यांच्या फ्लॅटच्या दरवाजाचे लॅच तोडून त्यांच्या घरातील रोख रक्कम तसेच सोन्याचे व प्लॅटिनमचे दागिने, विदेशी घड्याळ असा सुमारे पावणेआठ लाख रुपये किमतीचा ऐवज चोरून नेला. दरम्यान, कामावर गेलेले आनंद पारकल हे दुपारी दोनच्या सुमारास घरी परतल्यानंतर घरामध्ये चोरी झाल्याचे त्यांच्या निदर्शनास आले. त्यामुळे त्यांनी नेरुळ पोलिस ठाण्यात याबाबत तक्रार दाखल केली. या तक्रारीवरून पोलिसांनी चोरांविरोधात घरफोडीचा गुन्हा दाखल करून त्याचा शोध सुरू केला आहे.
पावणेआठ लाखांची लूट
नेरुळ सेक्टर २७ मधील मेरिडियन मिस्टक या इमारतीत घरफोडी भरदिवसा करून सुमारे पावणेआठ लाख रुपये किमतीचा ऐवज चोरून नेल्याची घटना उघडकीस आली आहे.
Maharashtra Times 12 Aug 2017, 3:00 am