दरोडेखोर जेरबंद

नवी मुंबई : घणसोली सेक्टर-३ मधील मुत्तुट फिनकॉर्म या फायनान्स कंपनीवर दरोडा टाकण्यासाठी आलेल्या सहा जणांच्या टोळीला कोपरखैरणे पोलिसांनी अटक केली आहे. पोलिसांनी त्यांच्याकडून गावठी बनावटीचे रिव्हॉल्वर, खंजीर आदी हत्यारे जप्त केली आहेत. याच टोळीतील तिघा लुटारूंनी घणसोली सेक्टर-४ मधील जय मातादी कॅटरर्सच्या कार्यालयात काम करणाऱ्या तरुणीचे हात-पाय बांधून ४० हजार रुपयांची रोख रक्कम लुटून नेल्याचे निष्पन्न झाल्याची माहिती कोपरखैरणे पोलिस ठाण्याचे वरिष्ठ पोलीस निरीक्षक सतीश गायकवाड यांनी दिली. या टोळीवर व्ही. पी. रोड व रबाळे पोलीस ठाण्यात देखील गंभीर गुन्ह्यांची नोंद आहे.

पोलिसांनी अटक केलेल्या दरोडेखोरांमध्ये शोएब उर्फ छबन रुस्तम खान (२७), ननकु उर्फ राजू सयामुद्दीन गौतम (३८), संतोष उर्फ सोनू लिंबाजी डोंगरे (१९), बाबर उर्फ शब्बीर नाझिर अली (२७), आणि आसिफ अहमद खान (२६) या सहा जणांचा समावेश आहे. सहाय्यक पोलिस निरीक्षक उमेश मुंडे, रविंद्र अहिरे, पोलिस उपनिरीक्षक विजय चव्हाण, योगेश देशमुख व त्यांच्या पथकाने १४ सप्टेंबर रोजी घणसोली सेक्टर-३ भागात सापळा लावून या टोळीला पकडले होते. त्यांच्याजवळ गावठी बनावटीचे रिव्हॉल्वर, खंजिर व अन्य हत्यारे आढळून आली.