म. टा. वृत्तसेवा, नवी मुंबई
हार्बर आणि ट्रान्स हार्बर रेल्वे मार्गावर तुर्भे, नेरूळ आणि सीवूड्स रेल्वे स्थानकाजवळ बुधवारी झालेल्या तीन वेगवेगळ्या अपघातांत तिघांचा मृत्यू झाल्याची घटना घडली. या अपघातातील केवळ एकाची ओळख पटली असून अन्य दोघांची ओळख पटविण्यासाठी रेल्वे पोलिसांकडून प्रयत्न करण्यात येत आहे. या अपघातातील तिघांचा रेल्वे रूळ ओलांडाताना लोकलची धडक लागून मृत्यू झाला आहे.
नेरूळ रेल्वे स्थानकाजवळ दुपारी पावणे दोन वाजण्याच्या सुमारास घडलेल्या पहिल्या अपघातात रेल्वे रूळ ओलांडणाऱ्या ३५ वर्षीय अज्ञात व्यक्तीला लोकलची धडक लागल्याने त्याचा मृत्यू झाला. या मृत व्यक्तीची अद्याप ओळख पटलेली नाही. या अपघातानंतर सायंकाळी पावणेपाच वाजण्याच्या सुमारास तुर्भे रेल्वे स्थानकाजवळ घडलेल्या दुसऱ्या अपघातात रेल्वे रूळ ओलांडून जाणाऱ्या विरोह मेहता (२०) या तरुणाला लोकलची धडक लागल्याने त्याचा मृत्यू झाला. विरोह मेहता याला वाशी रेल्वे पोलिसांनी एका गुन्ह्यात अटक केली होती. काही महिन्यांपूर्वीच तो तुरुंगामधून सुटून आला होता.
या अपघातानंतर सायंकाळी सव्वापाच वाजण्याच्या सुमारास नेरूळ ते सीवूड्स या रेल्वे स्थानकादरम्यान, घडलेल्या तिसऱ्या अपघातात रेल्वे रूळ ओलांडून जाणाऱ्या ४० वर्षीय व्यक्तीला भरधाव लोकलची धडक लागली. या अपघातात त्याचाही मृत्यू झाला. या मृत व्यक्तीचीदेखील अद्याप ओळख पटली नसल्याची माहिती रेल्वे पोलिसांनी दिली. या तिन्ही अपघातांची नोंद वाशी रेल्वे पोलिस ठाण्यात करण्यात आली आहे.