विद्यार्थिनीची आत्महत्या

नवी मुंबई : मोबाइलफोनवर चॅटिंग करत असल्याच्या संशयावरून वडिलांकडून समज मिळाल्याने बारावीत शिकणाऱ्या घणसोलीतील अंकिता सोनवणे (१७) या विद्यार्थिनीने राहत्या घरात गळफास घेऊन आत्महत्या केल्याची घटना रविवारी उघडकीस आली. रबाळे पोलिसांनी या प्रकरणी आकस्मिक मृत्यूची नोंद केली.

घणसोलीतील घरोंदा वसाहतीमधील सिद्धेश्वर इमारतीत आई-वडील आणि लहान बहिणीसह राहणारी अंकिता नेरुळमधील कॉलेजात बारावीचे शिक्षण घेत होती. शनिवारी रात्री ती घरातील स्वयंपाकघरामध्ये बसून अभ्यास करत होती. रविवारी पहाटेच्या सुमारास गाणी ऐकण्यासाठी तिने वडिलांचा मोबाइल घेतला होता. मात्र अंकिता कुणाशीतरी मोबाइलवरून चॅटिंग करत असल्याचा तिच्या वडिलांचा समज झाला. त्यांनी अंकिताला अभ्यास करण्याबाबत समज दिली. अंकिताने त्याच रागात गळफास घेऊन आत्महत्या केल्याचा संशय आहे.