फसवणूकप्रकरणी दोघांना अटक

नवी मुंबई : परदेशात नोकरी मिळवून देण्याचे अमिष दाखवून अनेक बेरोजगार तरुणांकडून लाखो रुपये उकळून त्यांची फसवणूक करणाऱ्या प्रवीण कुमार लालचंद (४२) आणि तेजस विशाल टंडन (३४) या दोघांना वाशी पोलिसांनी अटक केली. त्यांच्याकडून ३ लाख ९३ हजार रुपयांची रोख रक्कम हस्तगत केली आहे. या दोघांनी १५ ते २० बेरोजगारांची फसवणूक केल्याचे आढळून आले असले तरी आतापर्यंत पाच तक्रारदारांनी पोलिसांकडे तक्रार दाखल केली.

प्रवीणकुमार लालचंद याने वाशीतील हावरे इन्फोटेक पार्क इमारतीमध्ये व्हेंचर्स ओव्हरसीज करिअर कन्सल्टंट नावाने दीड वर्षांपूर्वी कार्यालय सुरू केले होते. तेजस विशाल टंडन या महिलेला कामाला ठेवले होते. त्यानंतर या दोघांनी इंटरनेट व सोशल मीडियाच्या माध्यमातून कॅनडा देशात नोकरी मिळवून देण्याची जाहिरातबाजी करून अनेक तरुणांची फसवणूक केली आहे.