गुन्हेगार हद्दपार

नवी मुंबई : दिघा व रबाळे भागात गुन्हेगारी कारवाया करणाऱ्या दोन गुन्हेगारांना रबाळे एमआयडीसी पोलिसांनी नुकतेच हद्दपार केले आहे. सुरेश यशवंत पाटील (५१) आणि आनंद अंगत म्हेत्रे उर्प आन्या (२०) अशी त्यांची नावे आहेत.

सुरेश हा दिघा येथील संजय गांधी नगर भागात राहण्यास असून त्याने साथीदारासह संजय गांधी नगर, चिंचपाडा, यादव नगर व आजुबाजूच्या परिसरामध्ये प्राणघातक हत्यार बाळगून रहिवाशांना विनाकारण दमदाटी व दादागिरी करून दहशत निर्माण केली होती. घरफोडी-चोरी व दुखापतीप्रकरणी त्याच्यावर रबाळे पोलिस ठाण्यात अनेक गुन्हे दाखल आहेत. त्याला चोर सुऱ्या नावानेही ओळखले जाते. तर रबाळे येथील महात्मा गांधी नगर भागात राहणाऱ्या आनंद अंगत म्हेत्रे ऊर्फ आन्या यानेदेखील त्याच्या साथीदारासह रबाळे परिसरातील भिमनगर, साईबाबा नगर, दिवा नाका व आजुबाजूच्या परिसरात प्राणघातक हत्यार घेऊन दादागिरी करून दहशत निर्माण केली होती.