साताऱ्यात दोन करोनाबाधित
म. टा. वृत्तसेवा, सातारा
क्रांतीसिंह नाना पाटील सर्वसाधारण रुग्णालय, सातारा येथे मुंबईहून प्रवास करून आलेला २३ वर्षीय तरुण व पुणे येथून प्रवास करून आलेला आणि आठ मे रोजी विलगीकरण कक्षात दाखल केलेला ३६ वर्षीय तरुण, असे एकूण दोन जण करोनाबाधित असल्याचे जिल्हा शल्यचिकित्सक डॉ. आमोद गडीकर यांनी कळविले आहे.
सातारा येथील ५० वर्षीय कॅन्सर पिडीत रुग्ण उपचारासाठी पुणे येथे गेला असता, तो करोनाबाधित असल्याचे निष्पन्न झाल्याने आयसीएमआर पोर्टलमध्ये सातारा जिल्ह्याच्या यादीमध्ये त्याचे नाव समाविष्ट करण्यात आले आहे. त्यामुळे जिल्ह्यात एकूण तीन बाधित रुग्णांची नोंद झाली आहे.
दरम्यान, शनिवारी रात्री उशिरा कोरेगाव व महाबळेश्वरचे दोन करोनाबाधित आढळून आले आहेत. त्यातील एक जण महाबळेश्वर तालुक्यातील रहिवासी असून, त्याला शिरवळ येथेच पकडण्यात आले होते, तो मुंबईतून येत होता.
दुसरा व्यक्ती कोरेगाव तालुक्यातील त्रिपुटी गावचा आहे. हे गाव सातारा शहरापासून केवळ दहा किमी अंतरावर आहे. रुग्ण ट्रक चालक होता, तो राजस्थान येथून तो घरी आला होता. त्याला होम क्वारंटाइन केले होते. पण, नियमांचे पालन केले नाही. मित्रांसोबत पत्ते खेळत होता. त्याच्या घरी पत्नी व दोन मुले असा परिवार आहे. घरात असताना सतत ताप येत होता. त्यामुळे खबरदारीचा उपाय म्हणून ब्रह्मपुरी येथे ठेवण्यात आले. रिपोर्ट पाँझिटिव्ह आला असल्याने त्रिपुटी गावात घबराटीचे वातावरण आहे. प्रशासन त्रिपुटी, भिवडी व जांब ही गावे सील करणार आहे. रुग्णाच्या संपर्कातील लोकांची यादी करून त्यांना विलगीकरण कक्षात ठेवण्यात येणार आहे.
दरम्यान, जिल्ह्यात आतापर्यंत करोनाबाधित झालेल्या व्यक्तींची संख्या ११९ झाली असून, यापैकी उपचार घेत असलेले बाधित रुग्ण ९७ आहेत. करोनामुक्त होऊन घरी गेलेल्या रुग्णाची संख्या २० आहे. दोन करोनाबाधितांचा मृत्यू झाला आहे.