सव्वादोन कोटींच्या जुन्या नोटा जप्त

म. टा. वृत्तसेवा, उरण

बुधवारी रात्री रायगड जिल्ह्यातील सुधागड पाली येथे सुमारे सव्वादोन कोटी रुपयांच्या जुन्या नोटा जप्त करण्यात आल्या आहेत. यामध्ये आठ जणांना चौकशीसाठी ताब्यात घेण्यात आले आठ जणांना चौकशीसाठी ताब्यात घेण्यात आले आहे.

पाली पोलिसांना बुधवारी सायंकाळी काही व्यक्ती जुन्या नोटा घेऊन पाली परिसरात येणार असल्याची माहिती मिळाली होती. त्यानुसार पाली पोलिसांनी पाली-खोपोली मार्गावरील खुरावले फाटा येथे नाकाबंदी करून वाहनांची तपासणी केली असता प्रवाशांकडे ५०० आणि एक हजार रुपयांच्या जुन्या नोटा आढळून आल्या. यामध्ये सहा प्रवासी आणि दोन चालकांना ताब्यात घेण्यात आले आहे.

या प्रकरणात चलनातून रद्द करण्यात आलेल्या नोटा जवळ बाळगल्याप्रकरणी अदखलपात्र गुन्हा नोंदविण्यात आला आहे. यामध्ये आठ जणांना चौकशीसाठी ताब्यात घेण्यात आले असून ते ठाणे, डोंबिवली, शहापूर आण‌ि उल्हासनगर येथे राहणारे आहेत. तसेच, एक हुंदाई अॅसेंट कार आणि एक स्विफ्ट डिझायर कारदेखील ताब्यात घेण्यात आली आहे. तर, ही रक्कम नेमकी कुठे नेण्यात येणार होती याचा शोध घेतला जात असल्याचे पोलीस अधीक्षक अनिल पारसकर यांनी सांगितले आहे.