म. टा. वृत्तसेवा, नवी मुंबई
स्वच्छतेबाबत राष्ट्रीय स्तरावर नावलौकिक मिळविल्यानंतर आता आरोग्य सेवादेखील सक्षम करण्यासाठी नवी मुंबई महापालिकेतर्फे प्रयत्न केले जात आहेत. यासाठी जगातील पहिले टायफॉइड कंज्यूगेट लसीकरण अभियान येत्या १४ जुलैपासून नवी मुंबई महापालिका क्षेत्रात सुरू करण्यात येणार असल्याची माहिती नवी मुंबईचे महापौर जयवंत सुतार यांनी पत्रकार परिषदेत दिली.
कॅन्सर, क्षयरोग अशा गंभीर आजारांसोबतच टायफॉइड या आजारानेही डोके वर काढले आहे. टायफॉइड (विषमज्वर) आजाराला प्रतिबंध करण्यासाठी सध्या बाजारात अनेक लसी आहेत. टायफॉइडवर प्रभावी आणि दीर्घकाळ नियंत्रण ठेवण्यासाठी टायफॉइड कंज्युगेट व्हॅक्सिन (लस) बाजारात आली आहे. या लसीचा खासगी क्षेत्रात वापर होत असताना सार्वजनिक क्षेत्रात प्रथमच नवी मुंबई महापालिकेने टायफॉइड कंज्युगेट व्हॅक्सिन मोहीम शहरात राबविण्याचा निर्णय घेतला आहे.
जागतिक आरोग्य संघटनेच्या प्रस्तावानुसार, जगातील पहिले टायफॉइड लसीकरण अभियान शनिवार, १४ जुलैपासून संपूर्ण नवी मुंबई शहरात दोन टप्प्यांमध्ये सुरू होत आहे. पहिल्या टप्प्यात पालिकेच्या एकूण २२ नागरी प्राथमिक आरोग्य केंद्रापैकी ११ नागरी प्राथमिक आरोग्य केंद्राच्या हद्दीत नऊ महिने ते १५ वर्षे या वयोगटातील एक लाख ८१ हजार ५९८ मुलांना लसीकरण करण्यात येणार आहे. यासाठी महापालिका एक हजार २१० केंद्रे उभारणार आहे. १४ जुलै ते २५ ऑगस्टदरम्यान पार पडणारे लसीकरण अभियान शनिवार, रविवार व सार्वजनिक सुट्टीचे दिवस म्हणजेच १४, १५, २१, २२, २३, २८ व २९ जुलै आणि १२, १७, १८, १९, २२ व २५ ऑगस्ट या दिवशीही सुरू राहणार आहे.
केंद्र व राज्य सरकारच्या लसीकरण मोहिमेत टायफॉइड कंज्युगेट लसीचा समाविष्ट नसल्याने जगात प्रथमच सार्वजनिक क्षेत्रात सर्वसामान्य नागरिकांच्या बालकांसाठी ही लस मोफत उपलब्ध करून देणारी नवी मुंबई पालिका पहिली महापालिका ठरणार आहे. हे लसीकरण ऐच्छिक असल्याचे सांगत नवी मुंबई पालिकेसाठी हे लसीकरण अभियान ऐतिहासिक असल्याचे महापालिका आयुक्त डॉ. रामास्वामी एन. यांनी सांगितले.
चार लाख बालकांना लसीकरण
टायफॉइड कंज्युगेट लस पालिकेच्या वतीने मोफत दिली जाणार आहे. पालिका हद्दीतील सुमारे चार लाख बालकांना लसीकरण केले जाईल. लसीकरणासाठी लागणाऱ्या एकूण लसींपैकी एक लाख लस कंपनीतर्फे मोफत देण्यात येणार आहे. तर, उर्वरित तीन लाख लसींसाठी महापालिका सहा कोटी रुपये खर्च करणार आहे.