म. टा. विशेष प्रतिनिधी, मुंबई
'दि इन्स्टिट्यूट ऑफ चार्टर्ड अकाऊंट्स ऑफ इंडिया'मार्फत (आयसीएआय) मे महिन्यात घेण्यात आलेल्या सीए फायनल आणि फाऊंडेशन परीक्षेचा ऑनलाइन निकाल शुक्रवारी जाहीर झाला. यंदा सीएची परीक्षा जुना अभ्यासक्रम आणि नवा अभ्यासक्रम अशा दोन विभागांत झाली. जुन्या अभ्यासक्रमाचा निकाल ९.०९ टक्के तर, नव्या अभ्यासक्रमाचा निकाल ९.८३ टक्के लागला आहे. देशभरातून जुन्या अभ्यासक्रमातून ९१०४ विद्यार्थी तर नव्या अभ्यासक्रमातून १३९ विद्यार्थी सीए झाले आहेत.
सीएबरोबरच सीपीटी आणि फाऊंडेशन परीक्षेचा निकालही जाहीर करण्यात आला असून, तो अनुक्रमे २८.०६ आणि १९.२४ टक्के लागला आहे. सीएमध्ये परीक्षेतील नव्या अभ्यासक्रमाची ९३६ विद्यार्थ्यांनी दोन्ही ग्रूपची परीक्षा दिली होती. यापैकी ९२ विद्यार्थी उत्तीर्ण झाली आहेत. यात सुतरचा प्रीत शहा देशात पहिला आला आहे. तर बेंगळुरूचा अभिषेक नागराज दुसरा आणि उल्हासनगरची समीक्षा अग्रवाल देशात तिसरी आली. जुन्या अभ्यासक्रमाची २७,७२७ विद्यार्थ्यांनी दोन्ही ग्रूपची परीक्षा दिली होती. यापैकी २५२० विद्यार्थी दोन्ही ग्रूप उत्तीर्ण झाले आहेत. या परीक्षेत जयपूरचा अतुल अग्रवाल देशात पहिला आला. अहमदाबादचा संदीप दलाल दुसरा तर सुरतमधील अनुराग बगारिया तिसरा आला.
अथक परिश्रमांमुळे यश
पहिल्याच प्रयत्नात सीएची परीक्षा उत्तीर्ण होणार हा आत्मविश्वास असला तरी राज्यात प्रथम येण्याचा मान मिळणे हा निश्चित आनंदाचा सुखद धक्का आहे. कुटुंबात यापूर्वी कोणीही सीएची परीक्षा उत्तीर्ण झाले नसले तरी प्रत्येकाचा पाठिंबा अनमोल होता. परीक्षेचे स्वरूप लक्षात घेत सराव करण्यावर भर दिला होता. सरावासाठी मिळालेले प्रत्येक साहित्य बारकाईने अभ्यासले. परीक्षा अवघड असली तरी सरावातील सातत्य आणि परीक्षेपूर्वी चार महिने झोकून देत दिवसातील १२ ते १४ तास केलेला अभ्यास यांच्याआधारे परिक्षा नक्की उत्तीर्ण करता येऊ शकते. - समीक्षा अग्रवाल
सीपीटी निकाल
विद्यार्थी - २९९६२पैकी ८३६८ उत्तीर्ण
विद्यार्थिनी - २४५१२पैकी ६९१६ उत्तीर्ण
सीए फायनल
अभ्यासक्रम बसलेले विद्यार्थी उत्तीर्ण झालेले विद्यार्थी
ग्रुप १ ग्रुप २ दोन्ही ग्रुप ग्रुप १ ग्रुप २ दोन्ही ग्रुप
जुना ३८६९६ ३७३५० २७७२७ ६१९५ ५०५७ २५२०
नवा २२८९ १२०८ ९३६ २६० ९६ ९२