नियम डावलून गणवेशवाटप

नवी मुंबई : नवी मुंबई महापालिका शाळांमध्ये मुलांचे आणि पालकांचे बँक खाते उघडणे बंधकारक असून ५ डिसेंबर २०१६ रोजी आलेल्या शासन निर्णयानुसार महापालिका या खात्यात शालेय साहित्याकरिता लागणारी रक्कम जमा करणार आहे. मात्र सरकारच्या नियमांचे उल्लंघन करत शाळांमध्ये गणवेशाचे वाटप सुरू असल्याचा प्रकार नुकत्याच पार पडलेल्या स्थायी समितीतच्या बैठकीत उघडकीस आला. अनेक शाळांमध्ये कंत्राटदारांकडून शालेय गणवेश पुरविले जात असून त्याचे अधिकार कुणी दिले, असा प्रश्न स्थायी समिती सदस्यांकडून शिक्षण विभागाला विचारण्यात आला.

शहरातील काही विभागांमधील शाळांमध्ये आतापर्यंत ६० टक्के शालेय गणवेशाचे वाटप झाल्याची माहिती नगरसेवक जे. डी. सुतार यांनी दिली. सरकार निर्णयाला केराची टोपली दाखवत शिक्षण विभागाचा मनमानी कारभार सुरू असल्याची प्रतिक्रिया सदस्यांनी व्यक्त केली.